୪୦ ଦିନ ହେବ ସୁଧୀର ନିଖୋଜ, ଅନୁଗୁଳ ପୋଲିସ କରୁଛି କ’ଣ?
ଅନୁଗୁଳ(ବଡ଼ ଖବର ବ୍ୟୁରୋ): ହସଖୁସିର ପରିବାରରେ ଘୋଟି ଆସିଛି କଳାବାଦଲ । ହଠାତ୍ କୁଆଡେ ନିଖୋଜ ହୋଇଯାଇଛି ରୋଜଗାରିଆ ପୁଅ । ପୁଅକୁ ଝୁରି ଝୁରି ମାଆ ଆଖିରୁ ଲୁହ ଶୁଖୁନି । ବେସାହାରା ହୋଇଯାଇଛନ୍ତି ପରିବାରର ୯ ପ୍ରାଣୀ । ଏ ହେଉଛି ଅନୁଗୁଳ ଜିଲ୍ଲା କୁକୁଡ଼ା ପଞ୍ଚାୟତର ଘୂଞ୍ଚାପାଳ ଗାଁର ସୁଧୀର ନାୟକଙ୍କ କାହାଣୀ । ସୂଧୀର ଗାଡି ଚଳାଇ ପରିବାରର ନଅ ଜଣଙ୍କ ପେଟ ପୋଷୁଥିଲେ । ବେସ ହସଖୁସିରେ ଥିଲା ସୁଧୀରଙ୍କ ପରିବାର ।
ହେଲେ ଜୁଲାଇ ମାସ ୩ ତାରିଖରେ ହଠାତ୍ କୁଆଡେ ନିଖୋଜ ହୋଇଯାଇଥିଲେ ସୁଧୀର । ଘର ଲୋକଙ୍କ ଖୋଜା ଖୋଜି ପରେ ବି ସୁଧୀରଙ୍କ ପତା ମିଳିନଥିଲା । ପରିବାର ଲୋକଙ୍କ ସବୁ ଚେଷ୍ଟା ପରେ ବି ସୁଧୀରଙ୍କ ଖବର ମିଳୁନି । ଚାହିଁ ଚାହିଁ ପରିବାର ଲୋକଙ୍କ ଆଖିରୁ ନିଦ ହଜି ଯାଇଛି । ରୋଜଗାରିଆ ପୁଅ ନିଖୋଜରେ ପରିବାରର ଅବସ୍ଥା ଜଟିଳ ହୋଇ ପଡିଛି । କୌଣସି ରୋଜଗାର ନଥିବାରୁ ଓଳିଏ ଖାଇଲେ ଓଳିଏ ଉପାସ ରହୁଛନ୍ତି ପରବାର ଲୋକେ ।
ଏ ନେଇ ଅନୁଗୁଳ ଥାନାରେ ଲିଖିତ ଅଭିଯୋଗ ମଧ୍ୟ କରିଥିଲେ ପରିବାର ଲୋକେ । ହେଲେ ନିଖୋଜ ହେବାର ୪୦ ଦିନ ବିତିଗଲାଣି, ସେ ଜୀବିତ କି ମୃତ ଏ ଖବର ମଧ୍ୟ ନାହିଁ । ଏବେ କେବଳ ପୋଲିସ ଉପରେ ଭରସା ରଖି ସୁଧୀରଙ୍କ ଫେରିବା ବାଟକୁ ଚାହିଁ ରହିଛନ୍ତି ପରିବାର ଲୋକେ । କୋଣସି ବ୍ୟକ୍ତି ସୁଧୀରଙ୍କ ଖବର ପାଇଲେ ଖବର ଦେବା ପାଇଁ ଆକୁଳ ନିବେଦନ କରିଛନ୍ତି ପରିବାର ଲୋକେ ।