ଦୁର୍ଦ୍ଦିନରେ ମତ୍ସ୍ୟଜୀବୀ

ମହାକାଳପଡ଼ା (ବଡ଼ ଖବର ବ୍ୟୁରୋ): କରୋନା ମହାମାରୀ ଉଜାଡ଼ି ଦେଇଛି ମତ୍ସ୍ୟଜୀବୀଙ୍କ ଜୀବନଜୀବିକା । କେନ୍ଦ୍ରାପଡ଼ା ଜିଲ୍ଲାର ମତ୍ସ୍ୟଜୀବୀମାନେ ଦୁର୍ଦ୍ଦିନରେ ଦିନ କାଟୁଛନ୍ତି । ଜିଲ୍ଲାର ରାଜନଗର, ମହାକାଳପଡ଼ାର ଜମ୍ବୁ, ସୁନିତ, ରାମନଗର, ଖରିନାସୀ, ବତିଘର ଓ ଗୋଗୁଆ ପଞ୍ଚାୟତରେ ରହୁଥିବା ଶହ ଶହ ମତ୍ସ୍ୟଜୀବୀଙ୍କ ଜୀବିକା ଉଜୁଡ଼ିବାରେ ଲାଗିଛି । ଲକଡାଉନ ସଟଡାଉନ ଖୋଲିବା ପରେ ଲଘୁଚାପ ସାଜିଛି ବାଧକ । ଗୋଟିଏ ପରେ ଗୋଟିଏ ଲଘୁଚାପ ଆସୁଥିବାରୁ ସମୁଦ୍ର ଭିତରକୁ ଯିବାକୁ ପ୍ରଶାସନ ବାରଣ କରୁଛି । ପରିବାରର ଗୁଜୁରାଣ ମେଣ୍ଟାଇବା ସେମାନଙ୍କ ଲାଗି କଷ୍ଟ ହୋଇପଡୁଛି । ସେପଟେ ଋଣଭାର ମଧ୍ୟ ବଢ଼ିବାରେ ଲାଗିଛି । ରାଜ୍ୟରେ ପାରମ୍ପରିକ ମତ୍ସ୍ୟଜୀବୀ ସଂଘ ରହିଥିଲେ ସୁଦ୍ଧା ସରକାରଙ୍କ ନଜର ଏମାନଙ୍କ ଉପରେ ପଡୁନଥିବା କହିଛନ୍ତି ମତ୍ସ୍ୟଜୀବୀ ।