ଦିଲ୍ଲୀ ଭଳି ପଞ୍ଜାବରେ ମାଗଣା ସ୍ବାସ୍ଥ୍ୟ ସେବା: କେଜ୍ରିୱାଲ
ଚଣ୍ଡିଗଡ (ବଡ଼ ଖବର ବ୍ୟୁରୋ) : ପଞ୍ଜାବ କଂଗ୍ରେସରେ କନ୍ଦଳ । ରାଜ୍ୟରେ ରାଜନୈତିକ ଅସ୍ଥିରତା ସୃଷ୍ଟି ହୋଇଛି । ଏହି ପରିପ୍ରେକ୍ଷୀରେ ଅରବିନ୍ଦ କେଜ୍ରିୱାଲଙ୍କ ଆମ ଆଦମୀ ପାର୍ଟି ରାଜ୍ୟରେ ଦଳର ସ୍ଥିତି ସୁଦୃଢ ପାଇଁ ଅଣ୍ଟା ଭିଢିଛି । ଆଗକୁ ଆସୁଛି ପଞ୍ଜାବରେ ବିଧାନସଭା ନିର୍ବାଚନ । ନିର୍ବାଚନକୁ ଦୃଷ୍ଟିରେ ରଖି ଆମ୍ ଆଦ୍ମୀ ପାର୍ଟି(ଏଏପି) ସ୍ବତନ୍ତ୍ର ଯୋଜନା ପ୍ରସ୍ତୁତି କରିଛି। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏକ ଗଣମାଧ୍ୟମ ସମ୍ମିଳନୀରେ ଭୋଟରଙ୍କୁ ଆକର୍ଷିତ କରିବା ଲାଗି ଏକ ପ୍ରତିଶ୍ରୁତି ଦେଇଛନ୍ତି।
ସେ କହିଛନ୍ତି ଯେ, ଦିଲ୍ଲୀ ଭଳି ପଞ୍ଜାବରେ ମଧ୍ୟ ଲୋକଙ୍କୁ ମାଗଣାରେ ସ୍ବାସ୍ଥ୍ୟ ସେବା ଯୋଗାଇ ଦିଆଯିବ। ରାଜ୍ୟରେ ଆଧୁନିକ ସ୍ବାସ୍ଥ୍ୟ ସେବା ଯୋଗାଇବା ଏଏପିର ପ୍ରାଥମିକତା ହେବ। ଚିକିତ୍ସା ପାଇଁ ରାଜ୍ୟବାସୀଙ୍କୁ ଆଉ ବାହାରକୁ ଯିବାକୁ ପଡ଼ିବ ନାହିଁ ବୋଲି ସେ କହିଛନ୍ତି। ଦିଲ୍ଲୀ ଭଳି ପଞ୍ଜାବର ପ୍ରତି ଗଳିକନ୍ଦିରେ ମହୋଲ୍ଲା କ୍ଲିନିକ୍ ବା ପିଣ୍ଡ କ୍ଲିନିକ୍ ଖୋଲାଯିବ।
ରାଜ୍ୟରେ ୧୬ ହଜାର ଏଭଳି କ୍ଲିନିକ୍ ସ୍ଥାପନ ହେବ ବୋଲି କେଜ୍ରିଓ୍ବାଲ କହିଛନ୍ତି। ଏହା ସହିତ ରାଜ୍ୟର ପ୍ରତି ଲୋକଙ୍କୁ ହେଲଥ୍ କାର୍ଡ ପ୍ରଦାନ କରାଯିବା ସହ ଉନ୍ନତ ଚିକିତ୍ସା ସୁବିଧା ଯୋଗାଇ ଦିଆଯିବ। ସେହିପରି ସମସ୍ତ ସରକାରୀ ହସ୍ପିଟାଲରେ ଏୟାରକଣ୍ଡିଶନର ସ୍ଥାପନ କରାଯିବା ସହିତ ନୂଆ ହସ୍ପିଟାଲ ଖୋଲାଯିବ ବୋଲି କ୍ରେଜିଓ୍ବାଲ କହିଛନ୍ତି।