ଭେଟ ପାଇଁ ମନାକଲା ପ୍ରଶାସନ, ଗାଡ଼ିରୁ ଓହ୍ଲାଇ ଚାଷୀଙ୍କୁ ଭେଟିଲେ ରାଜ୍ୟପାଳ
ଅତାବିରା (ବଡ଼ ଖବର ବ୍ୟୁରୋ): ଚାଷୀଙ୍କୁ ଭେଟିଲେ ରାଜ୍ୟପାଳ । ଆଜି ବରଗଡ଼ ଜିଲ୍ଲା ଗସ୍ତରେ ଆସିଥିବା ଓଡ଼ିଶା ରାଜ୍ୟପାଳ ରଘୁବର ଦାସ ଅତାବିରାରେ ଏସଏଚଜିର ମହିଳାମାନଙ୍କୁ ସାକ୍ଷାତ କରିଥିଲେ । ପରେ ଅତାବିରାରୁ ବାହାରିବା ସମୟରେ ଅତାବିରା ଆରଏମସି ଗେଟ ସାମ୍ନାରେ ଅପେକ୍ଷା କରିଥିବା ଚାଷୀମାନେ ରାଜ୍ୟପାଳଙ୍କୁ ସାକ୍ଷାତ କରିବାକୁ ପ୍ରଶାସନକୁ ଅନୁରୋଧ କରିଥିଲେ । ହେଲେ ପ୍ରଶାସନ ମନା କରିଦେଇଥିଲେ । ତେବେ ରାଜ୍ୟପାଳ ଚାଷୀଙ୍କୁ ଦେଖି ଗାଡ଼ିରୁ ନିଜେ ଓଲ୍ଲାଇ ଚାଷୀଙ୍କୁ ସାକ୍ଷାତ କରିଛନ୍ତି ।
ରାଜ୍ୟପାଳ ଚାଷୀଙ୍କ ସହ ସେହି ଅଞ୍ଚଳରେ ଥିବା ବିଭିନ୍ନ ଚାଷ ଓ ଚାଷୀ ସମସ୍ୟା ନେଇ ଆଲୋଚନା କରିଛନ୍ତି । ପରେ ଓଡ଼ିଶା ରାଜ୍ୟ କୃଷକ ସଂଗଠନର ସଭାପତି ବୀରେନ୍ଦ୍ର କର ୯ ଦଫା ଦାବି ସମ୍ମିଳିତ ଏକ ସ୍ମାରକ ପାତ୍ର ରାଜ୍ୟପାଳଙ୍କୁ ପ୍ରଦାନ କରିଥିଲେ । ଚାଷୀ ସମସ୍ୟାକୁ ନେଇ ରାଜ୍ୟ ସରକାର ଓ ପ୍ରଶାସନିକ ଅଧିକାରୀମାନଙ୍କ ସହିତ ଆଲୋଚନା କରିବି ବୋଲି ମାନ୍ୟବର ରାଜ୍ୟପାଳ ରଘୁବର ଦାସ କହିଛନ୍ତି ।