୩୦ରେ କୃଷକ-କେନ୍ଦ୍ର ଆଲୋଚନା
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଗତ ଏକ ମାସ ଧରି ସିଙ୍ଘୁ ସୀମାରେ ନୂତନ କୃଷି ଆଇନକୁ ବିରୋଧ କରି ଚାଷୀମାନେ ଆନ୍ଦୋଳନ କରିଆସୁଛନ୍ତି । କୃଷି ସଂସ୍କାର ଆଇନର ଅବରୋଧକୁ ଶେଷ କରିବା ପାଇଁ କେନ୍ଦ୍ର ସରକାର ଡିସେମ୍ବର ୩୦ ଅପରାହ୍ନ ୨ ଟାରେ ଦିଲ୍ଲୀର ବିଜ୍ଞାନ ଭବନରେ ବିରୋଧୀ ଫାର୍ମ ୟୁନିଅନ ସହିତ ଏକ ଆଲୋଚନା କରିବାକୁ ନିସ୍ପତ୍ତି ନେଇଛନ୍ତି। ଶନିବାର ଦିନ ପ୍ରାୟ ଚାଳିଶ କୃଷକ ସଂଗଠନର ମିଳିତ ସାମ୍ମୁଖ୍ୟ ସରକାରଙ୍କୁ ଚିଠି ଲେଖି ଡିସେମ୍ବର ୨୯ ରେ ଆଲୋଚନା କରିବାକୁ ପ୍ରସ୍ତାବ ଦେଇଥିଲେ।
ଏ ସମ୍ପର୍କରେ ସିଙ୍ଘୁ ସୀମାରେ ସାମ୍ବାଦିକମାନଙ୍କୁ ସୂଚନା ଦେଇ ସ୍ୱରାଜ ଇଣ୍ଡିଆ ସଭାପତି ଯୋଗେନ୍ଦ୍ର ଯାଦବ କହିଛନ୍ତି, କୃଷି ଆଇନ ବିରୋଧରେ ଆନ୍ଦୋଳନ ଚଳାଇଥିବା ସମସ୍ତ କୃଷକ ନେତା ଓ କୃଷକ ସଙ୍ଗଠନଗୁଡ଼ିକର ପ୍ରତିନିଧିମାନେ ସରକାରଙ୍କ ସହ ଆଉ ଗୋଟିଏ ପର୍ୟ୍ୟାୟ ବୈଠକରେ ଯୋଗଦେବାପାଇଁ ନିଷ୍ପତ୍ତି ନେଇଛନ୍ତି। ବାରମ୍ବାର ବୈଠକ ପରେବି କେନ୍ଦ୍ର ସରକାର ନୂତନ କୃଷି ଆଇନକୁ ଗ୍ରହଣ କରିନେବା ପାଇଁ ଚାଷୀମାନଙ୍କୁ ରାଜି କରିବାରେ ବିଫଳ ହୋଇଥିବା ଦେଖାଯାଇଛି। କେନ୍ଦ୍ର ସରକାର ଚାଷୀଙ୍କ ନିକଟକୁ ସମାଧାନ ପାଇଁ ଅନେକ ପ୍ରସ୍ତାବ ପଠାଇଥିଲେ ମଧ୍ୟ ଏହାକୁ ମାନିବାକୁ ଚାଷୀ ମାନେ ନାରାଜ । ତେବେ ଡିସେମ୍ବର ୩୦ରେ ଥିବା ଆଲୋଚନାରେ କଣ ନିସ୍କର୍ଷ ବାହାରୁଛି ତାହାକୁ ସମସ୍ତଙ୍କ ଅପେକ୍ଷା ।