ସମ୍ବଲପୁର (ବଡ଼ ଖବର ବ୍ୟୁରୋ): ଇଚ୍ଛାଶକ୍ତି ଆଗରେ ହାର ମାନିଛି ଦାରିଦ୍ର୍ୟ । ସମ୍ବଲପୁରର ଝିଅ ଜ୍ୟୋତି ମୁଣ୍ଡା ସମ୍ବଲପୁର ଜିଲ୍ଲା ପାଇଁ ଆଣିଛନ୍ତି ଗର୍ବ ଓ ଗୌରବ । ଜ୍ୟୋତି ଭାରତୀୟ ସେନାରେ ଯୋଗଦେଇ ଦେଶ ସେବା କରିବାକୁ ଯୋଗ୍ୟ ବିବେଚିତ ହୋଇଛନ୍ତି । ସମ୍ବଲପୁର ଜିଲ୍ଲାର ଧନକଉଡ଼ା ବ୍ଲକ୍ ଝାରମୁଣ୍ଡା ଗ୍ରାମର ଆଦିବାସୀ ଝିଅ ଜ୍ୟୋତି ଆସାମ ରାଇଫଲ ରେଜିମେଣ୍ଟରେ ଯୋଗଦେବେ । ଏଥିପାଇଁ ଜ୍ୟୋତି ୨୦୧୮ରେ ଏସଏସସି ଦ୍ୱାରା ଲିଖିତ ପରୀକ୍ଷା ଓ ୨୦୧୯ରେ ଫିଜିକାଲ ଟେଷ୍ଟ ଦେଇ କୃତକାର୍ଯ୍ୟ ହୋଇଛନ୍ତି । ଏକ ଗରିବ ଆଦିବାସୀ ପରିବାରରୁ ଆସିଥିବା ଜ୍ୟୋତିଙ୍କ ଦୃଢ ମନୋବଳ ପାଇଁ ସଫଳତାରେ ଦାରିଦ୍ରତା ବାଧା ଦେଇନଥିଲା ।
ସେ ପିଲାଟି ଦିନରୁ ଦେଶ ସେବା ପାଇଁ ଲକ୍ଷ୍ୟ ରଖିଥିବା ବେଳେ ତାଙ୍କର ସ୍ୱପ୍ନ ପୂରଣ ହୋଇଛି ବୋଲି କହିଛନ୍ତି ଜ୍ୟୋତି । ଦୃଢ ଇଚ୍ଛାଶକ୍ତି ଥିଲେ ପରିସ୍ଥିତି ଯେମିତି ବି ଆସୁ ସଫଳତା ମିଳିବା ଶୁନିଶ୍ଚିତ । ଏକଥାକୁ ପ୍ରମାଣ କରି ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିପାରିଛନ୍ତି ସମ୍ବଲପୁରର ଝିଅ ଜ୍ୟୋତି ମୁଣ୍ଡା ।
