ମାଲକାନଗିରି (ବଡ଼ ଖବର ବ୍ୟୁରୋ): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ ରାଜ୍ୟର ସୁକମା ଜିଲ୍ଲାର ନକ୍ସଲଗଡରେ ନକ୍ସଲ ମୁକାବିଲାରେ ନିୟୋଜିତ ସୁରକ୍ଷା ବାହିନୀ ମାନବିକତାର ଏକ ଉଦାହରଣ ସୃଷ୍ଟି କରିଛନ୍ତି। ସିଆରପିଏଫ୍ ୫୦ ବାଟାଲିୟନର ଯବାନମାନେ ପେଣ୍ଟାପାଡର ଅସୁସ୍ଥ ଆଦିବାସୀ ମହିଳାଙ୍କୁ ଭାରରେ କାନ୍ଧେଇ ନେଇ ତିନି କିଲୋମିଟର ଚାଲିଲେ, ପରେ ତାଙ୍କୁ ଆମ୍ବୁଲାନ୍ସ ଯୋଗେ ଡାକ୍ତରଖାନା ନିଆଯାଇଥିଲା।
କମାଣ୍ଡାଣ୍ଟ ପ୍ରେମଜିତ କୁମାର ଏବଂ ସେକେଣ୍ଡ କମାଣ୍ଡିଂ ଅଫିସର ଅମୃତେଶ କୁମାରଙ୍କ ନିର୍ଦ୍ଦେଶରେ ଯବାନମାନେ ପାଟ୍ରୋଲିଂ କରିବାକୁ ଯାଇଥିଲେ। ଏହି ସମୟରେ ପେଣ୍ଟାପାଡ ଗ୍ରାମରେ ଜଣେ ଅସୁସ୍ଥ ମହିଳାଙ୍କୁ ଦେଖିବାକୁ ପାଇଥିଲା। ବର୍ଷା ଏବଂ ଖରାପ ରାସ୍ତା ଯୋଗୁଁ ଆମ୍ବୁଲାନ୍ସ ଗାଁରେ ପହଞ୍ଚି ପାରି ନଥିଲା। ଏହି କାରଣରୁ ଆସିଷ୍ଟାଣ୍ଟ କମାଣ୍ଡାଣ୍ଟ ମୃଣ୍ମୟ ବାନାର୍ଜୀ ଏବଂ ଯବାନମାନେ ମହିଳାଙ୍କୁ କାନ୍ଧରେ ନେଇ ଆମ୍ବୁଲାନ୍ସକୁ ଆଣିଥିଲେ। ତା’ପରେ ତାଙ୍କୁ ଡାକ୍ତରଖାନା ପଠାଯାଇଥିଲା।
