ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀ ମୃତ

ଯୁଯୁମୁରା(ବଡ଼ ଖବର ବ୍ୟୁରୋ): ଅଗ୍ନି ଦେବତାଙ୍କୁ ସାକ୍ଷୀରଖି କଥା ଦେଇଥିଲେ ସାତ ଜନ୍ମର ସାଥୀ ହୋଇ ରହିବେ । ସାତ ଜନ୍ମତ ଦୂରର କଥା, ଗୋଟିଏ ଜୀବନରେ ମଧ୍ୟ ସମ୍ଭବ ହେଲା ନାହିଁ । ଯାହାକୁ ଭରସା କରି ଘର ସଂସାର କରିଥିଲେ ପାର୍ବତୀ ତା’ରି ହାତରେ ତାଙ୍କର ଜୀବନ ଯାଇଛି । ଏଭଳି ଘଟଣା ଘଟିଛି ସମ୍ବଲପୁର ଜିଲ୍ଲା ଯୁଯୁମୁରା ଥାନା ମେଘପାଲ୍ ପଞ୍ଚାୟତର ଘୁସୁରିଆବହାଲ୍ ଗାଁରେ ।

ସନ୍ଧ୍ୟାରେ ଘୁସୁରିଆବହାଲ୍ ଗାଁର ପ୍ରମୋଦ ଭାଇଂସା (୪୮) ଏବଂ ତାଙ୍କ ସ୍ତ୍ରୀ ପାର୍ବତୀ (୪୫)ଙ୍କ ମଧ୍ୟରେ କୌଣସି କାରଣରୁ ଝଗଡ଼ା ହୋଇଥିଲା । ପ୍ରମୋଦ ରାଗରେ ଉତ୍ତ୍ୟକ୍ତ ହୋଇ ସ୍ତ୍ରୀ ପାର୍ବତୀଙ୍କୁ ମାଡପିଟ୍ କରିବା ସହ ଟାଙ୍ଗିଆରେ ମୁଣ୍ଡକୁ ହାଣି ଦେଇଥିଲେ । ଗ୍ରାମବାସୀଙ୍କ କହିବା ଅନୁସାରେ ପାର୍ବତୀ ଆହତ ହୋଇଥିଲେ ମଧ୍ୟ ମଙ୍ଗଳବାର ସକାଳୁ ଉଠି ଚଲାବୁଲା କରିଥିଲେ। ଏହି ସମୟରେ ପ୍ରମୋଦ କାମ ପାଇଁ ବାହାରକୁ ଚାଲିଯାଇଥିଲେ । ସନ୍ଧ୍ୟାରେ ଘରକୁ ଫେରିବା ସମୟରେ ପାର୍ବତୀଙ୍କ ମୃତ୍ୟୁ ହୋଇଥିବା ସେ ଦେଖିଲେ। ଏ ସମ୍ପର୍କରେ ଖବର ପାଇ ରେଢାଖୋଲ ଏସଡ଼ିପିଓ ହାଡିବଂଧୁ ସ୍ୱାଇଁ, ଯୁଯୁମୁରା ଥାନା ଅଧିକାରୀ ରାଜକୁମାର ବିଶ୍ୱାଳ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ମୃତ ପାର୍ବତୀଙ୍କ ୧୬ ଓ ୮ ବର୍ଷର ଦୁଇଝିଅ ଅଛନ୍ତି ।