ବିକାଶ ଠାରୁ ବହୁ ଦୂରରେ କାଦଦୋରା

ପାପଡାହାଣ୍ଡି (ବଡ଼ ଖବର ବ୍ୟୁରୋ): ଗ୍ରାମରେ ନାହିଁ କୂଅ କି ନଳକୂଅ । ଗ୍ରାମ ନିକଟସ୍ଥ ନାଳ କୂଳେ ଚୁଆ ଖୋଳି ପାଣି ପିଉଛନ୍ତି ଗ୍ରାମବାସୀ । ଏହା ପୂର୍ଵରୁ ଗ୍ରାମବାସୀ ନାଳର ପାଣି ବ୍ୟବହାର କରୁଥିବାବେଳେ ଗ୍ରୀଷ୍ମ ଋତୁ ଯୋଗୁଁ ନାଳ ଶୁଖି ଯିବା ଯୋଗୁଁ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ଏ ଦୃଶ୍ୟ ହେଉଛି ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ମୈଦଲପୁର ପଂଚାୟତ କାଦଦୋରା ଗ୍ରାମର ।

ସୂଚନା ଅନୁସାରେ, ଗ୍ରାମରେ ୨୫ରୁ ଅଧିକ ପରିବାର ରହୁଥିବାବେଳେ ଗାଇଗୋରୁ,ଛେଳିମେଣ୍ଢା ଓ ଚାଷବାସ କରି ପରିବାର ଚଳୁଛନ୍ତି । ପଂଚାୟତ କାର୍ଯ୍ୟାଳୟ ଠାରୁ ୮ କି ମି ଗୁଜମା ପଦର ଜଙ୍ଗଲ ରାସ୍ତା ଦେଇ ଗଲେ ପଡେ କାଦଦୋରା ଗାଁ । ପୂର୍ଵରୁ ଗ୍ରାମକୁ ଯିବା ପାଇଁ ପାଦ ଚଲା ରାସ୍ତା ଥିଲା । ଗ୍ରାମବାସୀଙ୍କ ଉଦ୍ୟମ ଯୋଗୁଁ ପାହାଡ଼ କାଟି ରାସ୍ତା କରାଯାଇଛି । ବହୁତ କଷ୍ଟରେ ବାଇକଟିଏ ଯାଇପାରୁଛି ।

କାଦଦୋରା ଗ୍ରାମକୁ ଭଲ ରାସ୍ତା ଖଣ୍ଡିଏ ନାହିଁ,ବିଜୁଳିନାହିଁ ,ନଳକୂଅ ନାହିଁ,ନେଟୱର୍କ ନାହିଁ, ଆବାସ ଯୋଜନା ନାହିଁ,ମୋଟା ମୋଟି କହିବାକୁ ଗଲେ ସରକାରୀ ଯୋଜନା ଅପହଞ୍ଚ । ଗ୍ରାମରେ ନଳକୂଅ ପାଇଁ ବହୁତଥର ପଂଚାୟତ, ବ୍ଲକରେ ଲିଖିତ ଅଭିଯୋଗ କରିବା ସହ ଡାବୁଗାଁ ବିଧାୟକ ମନୋହର ରନ୍ଧାରୀଙ୍କୁ ମଧ୍ୟ୍ୟ କହିଥିବା କହିଛନ୍ତି ଗ୍ରାମବାସୀ ।