ତାତିଲେ, ହୋହାଲ୍ଲା କଲେ, ଶେଷରେ ସାଙ୍ଗରେ ନେଇ ଆକଳନ କରାଇଲେ
କରଞ୍ଜିଆ, (ବଡ଼ ଖବର ବ୍ୟୁରୋ): ହାତୀ ଉପଦ୍ରବକୁ ନେଇ ତାତିଲେ ଗ୍ରାମବାସୀ । ରେଞ୍ଜ ଅଫିସରେ ପଶି ହୋହଲ୍ଲା କରିବା ସହ ରେଞ୍ଜରଙ୍କୁ ଘେରିଲେ ଅତିଷ୍ଠ କରଞ୍ଜିଆ ବ୍ଲକ ଡୁମୁରିଆ ଗ୍ରାମବାସୀ। କାହିଁକି ହାତୀ ଘୋଉଡାଉନ, କ୍ଷତିପୂରଣ ଆକଳନ କରୁନ ଆଦି ଅନେକ ଅଭିଯୋଗ କରିଛନ୍ତି ଗ୍ରାମବାସୀ। କରଞ୍ଜିଆ ବନଖଣ୍ଡ ଅନ୍ତର୍ଗତ ଦୁଧିଆଣି ରେଞ୍ଜ କାର୍ୟ୍ୟାଳୟର ଘଟିଛି ଏହି ଘଟଣା। ତେବେ ପରିସ୍ଥିତି ଉତ୍ତେଜନାପୂର୍ଣ୍ଣ ହେଉଥିବା ଦେଖି ସଙ୍ଗେ ସଙ୍ଗେ କରଞ୍ଜିଆ ପୋଲିସର ସାହାଯ୍ୟ ଲୋଡ଼ିଛି ବନବିଭାଗ।
ଲୋକଙ୍କ ଅସନ୍ତୋଷ ବଢିବା ଦେଖି ଉଭୟ ପୋଲିସ ଓ ଖୋଦ ଦୁଧିଆଣି ରେଞ୍ଜର ଦୀର୍ଘ ୧ଘଣ୍ଟା ଲୋକଙ୍କୁ ବୁଝାସୁଝା କରିଥିଲେ । ଶେଷରେ ତତ୍କାଳ କ୍ଷୟକ୍ଷତି ଆକଳନ କରିବାକୁ ଗାଁକୁ ଯିବାରୁ ଲୋକେ ଶାନ୍ତ ହୋଇଥିଲେ। ତେବେ ଗ୍ରାମବାସୀଙ୍କ କହିବାନୁସାରେ ଗତ ବର୍ଷ ମଧ୍ୟ ସମାନ ଧରଣର କ୍ଷୟକ୍ଷତି ହେଇଥିଲେ ମଧ୍ୟ ଆଜିଯାଏ କ୍ଷତିପୂରଣ ମିଳିନି । ଆଉ ଏବର୍ଷ ପୁଣି ବ୍ୟାପକ କ୍ଷୟକ୍ଷତି ପରେ ମଧ୍ୟ ବନବିଭାଗର ଦେଖାନାହିଁ। ସେହିପରି ହାତୀ ଘଉଡ଼ାଇବାରେ ଜାଣିଶୁଣି ଅବହେଳା କରୁଥିବାରୁ କ୍ଷୟକ୍ଷତି ପରିମାଣ ପ୍ରତିବର୍ଷ ବଢୁଛି ବୋଲି ବନବିଭାଗକୁ ସିଧାସଳଖ ଦାୟୀ କରିଛନ୍ତି ଲୋକେ।