ବନ୍ୟାପାଣି ଘେରରେ ଜୀବନ
ବାଲିଆପାଳ (ବଡ଼ ଖବର ବ୍ୟୁରୋ): ସୁବର୍ଣ୍ଣରେଖା ନଦୀରେ ବନ୍ୟା ଆସି ଉତ୍ତର ବାଲେଶ୍ଵରର ତଳିଆ ଅଞ୍ଚଳର ଲୋକଙ୍କ ଦୁର୍ଦ୍ଦଶା ବଢାଇଥିବା ବେଳେ ଲୋକେ ତିନିଦିନ ହେବ ବନ୍ୟାପାଣି ଘେରରେ ଜୀବନ ବିତାଉଛନ୍ତି। ତେବେ ଏହି ବନ୍ୟାପାଣି କାହାପାଇଁ ସର୍ବନାଶ ହୋଇଥିବା ବେଳେ ଆଉ କାହାପାଇଁ ପୌଷମାସ ହୋଇଛି। ସୁବର୍ଣ୍ଣରେଖା ନଦୀରେ ବନ୍ୟା ଆସିବା ଫଳରେ ଜାମକୁଣ୍ଡା ଠାରେ ସୁବର୍ଣ୍ଣରେଖାକୁ ସଂଯୋଗ କରୁଥିବା ବ୍ରିଟିଶ ଅମଳର କୋଷ୍ଟ କେନାଲ୍ ବାଲିକୁଟୀ ପଞ୍ଚାୟତ ଭିତରଦେଇ ବୋଳଂ ପର୍ଯ୍ୟନ୍ତ ଲାଗିଛି।
ତେବେ କୋଷ୍ଟ କେନାଲରେ ବନ୍ୟାପାଣି ଆସୁଥିବାବେଳେ ବାଲିକୁଟୀ ପଞ୍ଚାୟତର ମହାବଳା ଠାରେ କେନାଲ ଉପରେ ପ୍ରୋଜେକ୍ଟ ତିଆରି ହୋଇଛି। ତେବେ ବନ୍ୟାରେ ବିଭିନ୍ନ ଦେଶୀ ମାଛର ଅଣ୍ଡା ପହଣା ପାଣିରେ ଭାସୁଥିବାର ସ୍ଥାନୀୟ ଲୋକେ ଦେଖିବା ପରେ ଲୋକଙ୍କ ମଧ୍ୟରେ ପହଁଣା ଛୁଆ ଧରି ନିଜ ନିଜର ପୋଖରୀ ରେ ଛାଡିବା ପାଇଁ ଯେମିତି ପ୍ରତିଯୋଗିତା ଲାଗିଛି।
ନିଜର ଜୀବନକୁ ବାଜି ଲଗାଇ ମାଛଧରାରେ ବ୍ୟସ୍ତ ଲୋକେମାନେ। ସେପଟେ ପ୍ରୋଜେକ୍ଟ ତଳକୁ ଯୁବକମାନେ ଝୁଲିରହି ବିପଦ ସଂକେତ ଅବସ୍ଥାରେ ପହଁଣା ଛୁଆ ଧରୁଥିବା ଦେଖିବାକୁ ମିଳିଛି। ତେବେ ଏହା ଲୋକଙ୍କ ଜୀବନ ପ୍ରତି ବିପଦ ମଧ୍ୟ ରହିବା ସହ ଟିକିଏ ଅସାବଧାନ ହେଲେ କେନାଲରେ ଖସିପଡ଼ି ବନ୍ୟାପାଣି ରେ ଭାସିଯିବାର ଆଶଙ୍କା ରହିଛି। ତେବେ ସ୍ଥାନୀୟ ପ୍ରଶାସନ ଏଦିଗରେ ଦୃଷ୍ଟି ଦେବାକୁ ବୁଦ୍ଧିଜୀବୀ ଦାବି କରିଛନ୍ତି।