ଜାତୀୟ ହାରଠୁ ପଛରେ ଓଡ଼ିଶା

ନୂଆଦିଲ୍ଲୀ /ଭୁବନେଶ୍ୱର: ଆଜି ହେଉଛି ବିଶ୍ୱ ସାକ୍ଷରତା ଦିବସ । ଏହି ଅବସରରେ ଗତକାଲି ଜାତୀୟ ପରିସଂଖ୍ୟନ କାର୍ଯ୍ୟାଳୟ ପକ୍ଷରୁ ଦେଶର ସାକ୍ଷରତା ହାର ରିପୋର୍ଟ ପ୍ରକାଶିତ ହୋଇଛି । ୯୬.୨ ପ୍ରତିଶତ ସହ ସାକ୍ଷର ତାଲିକାରେ ପ୍ରଥମରେ ରହିଛି କେରଳ । କେରଳ ପଛକୁ ୮୮.୭ ପ୍ରତିଶତ ସହ ଦ୍ୱିତୀୟ ସ୍ଥାନରେ ରହିଛି ଦିଲ୍ଲୀ । ଉତ୍ତରାଖଣ୍ଡରେ ସାକ୍ଷରତା ହାର ୮୭.୬ %, ହିମାଚଳ ପ୍ରଦେଶରେ ୮୬.୬% ଓ ଆସାମରେ ୮୫.୯% ନାଗରିକ ସାକ୍ଷର ଅଟନ୍ତି । ତେବେ ଦେଶର ସାକ୍ଷରତା ହାର ହେଉଛି ୭୭.୭ ପ୍ରତିଶତ । ଓଡ଼ିଶାର ପ୍ରଦର୍ଶନ ଜାତୀୟ ହାରଠାରୁ ଖରାପ ରହିଛି । ଆମ ରାଜ୍ୟର ସାକ୍ଷରତା ହାର ରହିଛି ୭୭.୩% । ଅର୍ଥାତ୍ ଓଡ଼ିଶାରେ ଶହେରେ ପ୍ରାୟ ୭୭ ଜଣ ସାକ୍ଷର ଥିବା ବେଳେ ୨୩ ଜଣ ନିରକ୍ଷର । ଏହି ସଂଖ୍ୟା ସହ ତାଲିକାର ଦ୍ୱାଦଶ ସ୍ଥାନରେ ଓଡ଼ିଶା ରହିଛି । ତାଲିକାରେ ସବୁଠୁ ତଳେ ରହିଛି ଆନ୍ଧ୍ରପ୍ରଦେଶ । ଆନ୍ଧ୍ରରେ ସାକ୍ଷରତା ହାର ମାତ୍ର ୬୬.୪% । ବିହାରରେ ହାର ୬୯.୭%, ତେଲେଙ୍ଗାନାରେ ୭୨.୮%, ଉତ୍ତରପ୍ରଦେଶରେ ୭୩% ଓ ମଧ୍ୟପ୍ରଦେଶରେ ୭୩.୭% ରହିଛି । ଦେଶର ସହରାଞ୍ଚଳରେ ୮୭.୭% ସାକ୍ଷର ଥିବା ବେଳେ ଗ୍ରାମାଞ୍ଚଳରେ ଏହା ମାତ୍ର ୭୩.୫% । ପୁରୁଷ ସାକ୍ଷର ୮୪.୭% ଥିବାବେଳେ ମହିଳା ସାକ୍ଷରତା ହାର ଦେଶରେ ମାତ୍ର ୭୦.୩% । ଜୁଲାଇ ୨୦୧୭ରୁ ଜୁନ୍ ୨୦୧୮ ମଧ୍ୟରେ ସାରା ଦେଶରୁ ହୋଇଥିବା ସାମ୍ପଲ ସର୍ଭେ ଆଧାରରେ ଏହି ରିପୋର୍ଟ ପ୍ରକାଶିତ ହୋଇଛି ।