ସନ୍ଦେଶଖାଲିରେ ଜାରି ରହିବ ସିବିଆଇ ଯାଞ୍ଚ
ପଶ୍ଚିମବଙ୍ଗ (ବଡ଼ ଖବର ବ୍ୟୁରୋ): ସନ୍ଦେଶଖାଲି ମାମଲାରେ ସୁପ୍ରିମକୋର୍ଟରୁ ପଶ୍ଚିମବଙ୍ଗର ମମତା ବାନାର୍ଜୀ ସରକାରଙ୍କୁ କୌଣସି ଆଶ୍ୱସ୍ତି ମିଳିନାହିଁ । ସୁପ୍ରିମକୋର୍ଟ ମାମଲାର ଶୁଣାଣୀ କରି କହିଛନ୍ତି ସନ୍ଦେଶଖାଲି କେସ୍ରେ ସିବିଆଇ ଯାଞ୍ଚ ଜାରି ରହିବ । ସୁପ୍ରିମକୋର୍ଟ ମନ୍ତବ୍ୟ ଦେଇଛନ୍ତି ଯେ ଜଣେ ବ୍ୟକ୍ତିଙ୍କ ସ୍ବାର୍ଥ ରକ୍ଷା ପାଇଁ ରାଜ୍ୟ ସରକାର କିପରି ସୁପ୍ରିମକୋର୍ଟଙ୍କ ନିକଟକୁ ଯାଇପାରିବେ । ଏହି ମାମଲାରେ ସୁପ୍ରିମକୋର୍ଟ ହାଇକୋର୍ଟଙ୍କ ଆଦେଶ ଉପରେ କୌଣସି ପ୍ରକାର ରୋକ ଲଗାଇ ନାହାନ୍ତି ।
ସୁପ୍ରିମକୋର୍ଟ ଟିପ୍ପଣୀ କରିଛନ୍ତି କି ରାଜ୍ୟ ସରକାର କୌଣସି ଜଣେ ବ୍ୟକ୍ତିଙ୍କ ସୁରକ୍ଷା ଲାଗି ସୁପ୍ରିମକୋର୍ଟରେ କିପରି ଆବେଦନ କରିପାରିବେ । ଗ୍ରୀଷ୍ମ ଛୁଟିପରେ କୋର୍ଟ ଏହି ମାମଲାରେ ଶୁଣାଣୀ କରିବେ । ଏହି ମାମଲାର ଶୁଣାଣୀ ବିଚାରପତି ବି.ଆର୍. ଗଭଇ ଓ ବିଚାରପତି ସନ୍ଦୀପ ମେହେଟ୍ଟା କରିଛନ୍ତି । ତେବେ କୋଲକାତା ହାଇକୋର୍ଟ ଏହି ମାମଲାରେ ମମତା ସରକାରଙ୍କୁ ଜୋରଦାର ଝଟକା ଦେଇ ସନ୍ଦେଶଖାଲି କେସ୍ରେ ସିବିଆଇ ଯାଞ୍ଚ କରିବାର ନିଷ୍ପତ୍ତି ଶୁଣାଇଥିଲେ । ହାଇକୋର୍ଟ ଏହି ନିର୍ଦ୍ଦେଶ ଦେବା ସହ କହିଥିଲେ କି ଯାଞ୍ଚର ତଦାରଖ ମଧ୍ୟ କୋର୍ଟ କରିବେ ।