କୋଲକାତା (ବଡ଼ ଖବର ବ୍ୟୁରୋ): ଟ୍ରେନିଂ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାରେ ସାରା ଦେଶରେ ତେଜିଛି ଆନ୍ଦୋଳନ । ପଶ୍ଚିମବଙ୍ଗରୁ ଓଡ଼ିଶା, ହାଇଦ୍ରାବାଦରୁ ମୁମ୍ବାଇ ଦେଶର ପ୍ରତିଟି ସହରରେ ଏହାକୁ ନେଇ ବିରୋଧ । ରାସ୍ତାକୁ ଓହ୍ଲାଇ ଆନ୍ଦୋଳନ କରୁଛନ୍ତି ଡାକ୍ତରମାନେ । ତେବେ ଏହି ଘଟଣାକୁ ବିରୋଧ କରି ଆଜି ଭାରତୀୟ ଭେଷଜ ପରିଷଦ ପକ୍ଷରୁ ଦେଶବ୍ୟାପି ୨୪ ଘଣ୍ଟିଆ ଧର୍ମଘଟ ଡାକରା ଦିଆଯାଇଛି । ଆଜି ସକାଳ ୬ଟାରୁ ଆସନ୍ତାକାଲି ସକାଳ ପର୍ଯ୍ୟନ୍ତ ଧର୍ମଘଟ ଜାରି ରହିବ । ଡାକ୍ତରଙ୍କ ଆନ୍ଦୋଳନ ଯୋଗୁଁ ଡାକ୍ତିରୀ ସେବା ବ୍ୟାହତ ହୋଇଛି । ଧର୍ମଘଟ ସମୟରେ କେବଳ ଜରୁରୀ ସେବା ବ୍ୟତୀତ ଅନ୍ୟ ସବୁ ବନ୍ଦ ରହିବ ।
ଅନ୍ୟପଟେ ଏହି ଘଟଣାରେ ସିବିଆଇ ତଦନ୍ତ ଜାରି ରହିଛି। ପୀଡିତାଙ୍କ ବାପା ଓ ମାଆ ସିବିଆଇକୁ କହିଛନ୍ତି ଯେ, ଏହି ଘଟଣାରେ ଡାକ୍ତରଖାନାର ଅନେକ ଟ୍ରେନି ଏବଂ ଡାକ୍ତର ସମ୍ପୃକ୍ତ ଥାଇପାରନ୍ତି। ଯେଉଁମାନଙ୍କୁ ସେମାନେ ସନ୍ଦେହ କରୁଛନ୍ତି ସିବିଆଇକୁ ମଧ୍ୟ ସେମାନଙ୍କ ନାମ କହିଛନ୍ତି । ସିବିଆଇର ଜଣେ ଅଧିକାରୀ କହିଛନ୍ତି, ” ପୀଡିତାଙ୍କ ପିତାମାତା ଆମକୁ କହିଛନ୍ତି ଯେ, ତାଙ୍କ ଝିଅଙ୍କୁ ଦୁଷ୍କର୍ମ ଓ ହତ୍ୟା ଘଟଣାରେ ଡାକ୍ତରଖାନାର ଏକାଧିକ ଲୋକ ସାମିଲ ଥାଇପାରନ୍ତି । କିଛି ଟ୍ରେନି ଓ ଡାକ୍ତରଙ୍କ ନାମ ମଧ୍ୟ ଦେଇଛନ୍ତି। ପ୍ରାରମ୍ଭିକ ତଦନ୍ତରେ ସିବିଆଇ ସେମାନଙ୍କୁ ପଚରାଉଚରା କରିବାରେ ଅଧିକ ପ୍ରାଥମିକତା ଦେଉଛି।
