![](https://i0.wp.com/badakhabar.in/wp-content/uploads/2020/11/pari.jpg?fit=750%2C400&ssl=1)
ଭୁବନେଶ୍ୱର(ବଡ଼ ଖବର ବ୍ୟୁରୋ): ନୟାଗଡରେ ଘଟିଥିଲା ଏକ ଜଘନ୍ୟକାଣ୍ଡ । ଯେଉଁ ଘଟଣାଥିଲା ଅମାନବୀୟ, ନିନ୍ଦନୀୟ । ଏକ ଛୋଟ ଝିଅକୁ ଅପହରଣ ପରେ ହତ୍ୟା । କେହି ତା’ର ଆଖି ଓ କିଡ଼ନୀ ନେଇଯାଇଥିଲା । ଏହି ଜଘନ୍ୟ ଘଟଣାକୁ ୪ମାସ ବିତିଗଲାଣି । କିନ୍ତୁ ପୋଲିସ ଅଭିଯୁକ୍ତଙ୍କ ନିକଟରେ ପହଞ୍ଚିପାରି ନାହିଁ । ମୃତା ଶିଶୁର ପରିବାର ନ୍ୟାୟ ପାଇବାରେ ବିଫଳ ହେବା ସହ ପୋଲିସ ନିର୍ଯାତନାର ଶିକାର ହେଉଛନ୍ତି । ଆମେ କିପରି ନ୍ୟାୟ ପାଇବୁ ବୋଲି ସେମାନେ ପ୍ରଶ୍ନ କରିଛନ୍ତି ।
ଆଜି ବିଧାନସଭା ସମ୍ମୁଖରେ ଆତ୍ମହତ୍ୟା ଉଦ୍ୟମ କରି ଉଦ୍ଧାର ହୋଇଥିବା ନୟାଗଡ଼ର ଦମ୍ପତି ଛାତି ବାଡେଇ ଚିତ୍କାର କରୁଥିଲେ । ନିଜ କୋହକୁ ଚାପି ପାରିନଥିଲେ । ନ୍ୟାୟ ପାଇଁ ଅପେକ୍ଷା କରି ନିରାଶ ହେବା ପରେ ଆଜି ବିଧାନସଭା ସମ୍ମୁଖରେ ପହଞ୍ଚିଥିଲେ ନୟାଗଡ଼ ଜିଲ୍ଲା ଯଦୁପୁର ଗାଁର ଅଶୋକ ସାହୁ ଏବଂ ତାଙ୍କ ସ୍ତ୍ରୀ ସୌଦାମିନୀ ସାହୁ । ସେଠାରେ ନିଜ ଦେହରେ ଡିଜେଲ୍ ଢ଼ାଳି ଆତ୍ମହତ୍ୟା ଉଦ୍ୟମ କରୁଥିଲେ। ମାତ୍ର ଠିକଣା ସମୟରେ ପୋଲିସ ସେମାନଙ୍କୁ କାବୁ କରିବାରେ ସଫଳ ହୋଇଛି। ପୋଲିସ କାବୁ କରିବା ପରେ ଆତ୍ମାହୁତି ଉଦ୍ୟମ କରିଥିବା ଦମ୍ପତି କହିଛନ୍ତି- ‘ଝିଅ ପରୀର ମୃତ୍ୟୁକୁ ଅନେକ ମାସ ବିତିଥିଲେ ମଧ୍ୟ ଅଭିଯୁକ୍ତର ଟେର୍ ପାଉନି ପୋଲିସ । ଆମ କଥା କେହି ଶୁଣୁନାହାନ୍ତି କି ବୁଝୁନାହାନ୍ତି । ଆମ ଝିଅକୁ ମାରିଦେଲେ, ଆଖି ଓ କିଡନୀ ତାଡ଼ି ନେଲେ। ପୋଲିସ୍ ନିକଟରେ ଗୁହାରି କଲେ ପୋଲିସ ଶୁଣୁନି। ଆମକୁ ନ୍ୟାୟ ମିଳୁ ବୋଲି କହିଛନ୍ତି ଅଶୋକ ଓ ସୌଦାମିନୀ ।