ବର୍ତ୍ତମାନ ରାଜସ୍ଥାନର ପାଳି !
ବଡ଼ ଖବର ବ୍ୟୁରୋ: ସାରା ଦେଶରେ ବର୍ତ୍ତମାନ ମୁଖ୍ୟମୁନ୍ତ୍ରୀ ପରିବତ୍ତନର ଟ୍ରେଣ୍ଡ ଚାଲିଛି । କେତେବେଳେ ଗୁଜରାଟରେ ମୁଖ୍ୟମନ୍ତ୍ରୀ ପରିବର୍ତ୍ତନ ହେଉଛନ୍ତି ତ ଆଉ କେତେବେଳେ ପଞ୍ଜାବରେ । ତେବେ ଆଗକୁ ଥିବା ନିର୍ବାଚନକୁ ଦୃଷ୍ଟିରେ ରଖି ଦଳ ଗୁଡ଼ିକ ଏପରି କରୁଥିବାର ଅନୁମାନ କରାଯାଉଛି । ଏହା ଛଡ଼ା ସବୁଠାରୁ ରୋଚକ କଥାଟି ହେଉଛି ବିଜେପି ଓ କଂଗ୍ରେସ ଦଳିତଙ୍କୁ ନେଇ ଦେଶରେ ରାଜନୀତି ଆରମ୍ଭ କରିଦେଇଛନ୍ତି । ଏହାର ଜ୍ୱଳନ୍ତ ଉଦାହରଣ ଆମେ ପଞ୍ଜାବ ଓ ଗୁଜରାଟକୁ ଦେଖିଲେ ଜାଣିପାରିବା । ପଞ୍ଜାବରେ ଦଳୀୟ ବିବାଦ ଥମିଯାଇଥିବା ବେଳେ ରାଜସ୍ଥାନରେ ଉପୁଜିଥିବା ଦଳୀୟ ବିବାଦ ଥମିବା ବଦଳରେ ମୁଣ୍ଡ ଟେକିବାରେ ଲାଗିଛି । ମୁଖ୍ୟମନ୍ତ୍ରୀ ପଦ ପାଇଁ ରାଜସ୍ଥାନରେ ଉଭୟ ନେତାଙ୍କ ମଧ୍ୟରେ ବହୁ ଆଗରୁ ବିବାଦ ଆରମ୍ଭ ହୋଇଯାଇଛି । ଏପରିକି ଏହି ବିବାଦକୁ ବରିଷ୍ଠ ନେତା ବନାବ ଯୁବ ନେତାଙ୍କ ବିବାଦ ବୋଲି ଦୀର୍ଘଦିନ ଧରି ଚର୍ଚ୍ଚା ହୋଇ ଆସୁଛି ।
ତେବେ ପଞ୍ଜାବରେ କଂଗ୍ରେସ ଦଳୀୟ ବିବାଦକୁ ସମାପ୍ତ କରିବା ପରେ ବର୍ତ୍ତମାନ କଂଗ୍ରେସ ଶାସିତ ସମସ୍ତ ରାଜ୍ୟ ଗୁଡ଼ିକରୁ ଦଳୀୟ ବିବାଦକୁ ସମାପ୍ତ କରିବା ଲକ୍ଷ୍ୟରେ ଦଳ ରହିଛି । ଏହା ମଧ୍ୟରେ କଂଗ୍ରେସ ଦଳର ପୂର୍ବତନ ଅଧ୍ୟକ୍ଷ ଓ ସଚିନ ପାଇଲଟଙ୍କ ବୈଠକ କଥା ସାମ୍ନାକୁ ଆସିଛି । ଏହି ବୈଠକ କଥା ସାମ୍ନାକୁ ଆସିବା ପରେ ରାଜସ୍ଥାନରେ ମଧ୍ୟ ମୁଖ୍ୟମନ୍ତ୍ରୀ ପରିବର୍ତ୍ତନ ହେବ କି? ରାଜସ୍ଥାନରେ ମଧ୍ୟ ପଞ୍ଜାବ ଋଣନୀତି ଅନୁସରଣ କରାଯିବ କି? ବୋଲି ଦେଶବାସୀଙ୍କ ମନରେ ପ୍ରଶ୍ନ ଉଠିଛି । କାହିଁକିନା କ୍ୟାପଟେନ ଅମରିନ୍ଦର ସିଂହଙ୍କ ଇସ୍ତଫା ଦେବାର ଗୋଟିଏ ଦିନ ପରେ ଏହି ବୈଠକ ହୋଇଥିଲା । ଯାହାଫଳରେ ରାଜସ୍ଥାନରେ ମଧ୍ୟ ମୁଖ୍ୟମନ୍ତ୍ରୀ ପରିବର୍ତ୍ତନ ହେବାର ଚର୍ଚ୍ଚା ସାରା ଦେଶରେ ଜୋର ଧରିଥିଲା । ହେଲେ ଏହି ବୈଠକରେ ଉଭୟ ନେତା ରାଜସ୍ଥାନରେ ବର୍ତ୍ତମାନର ସ୍ଥିତି ଆଉ ୨୦୨୪ ନିର୍ବାଚନ ବିଷୟରେ ଆଲୋଚନା କରିଥିବାର ସୂଚନା ମିଳିଛି । ଅନ୍ୟପଟେ ଏହି ବୈଠକକୁ ନେଇ ସଚିନ ପାଇଲଟ କୌଣସି ବୟାନ ଦେଇନଥିବାର ଦେଖିବାକୁ ମିଳିଛି ।
କଂଗ୍ରେସ ଦଳ ଭଲଭାବରେ ବୁଝିଯାଇଛି ଯେ ଦଳୀୟ କନ୍ଦଳକୁ ସମାପ୍ତ ନକଲେ ନିର୍ବାଚନ ସହଜରେ ଜିତି ହେବ ନାହିଁ । ତେଣୁ ନିର୍ବାଚନକୁ ଦୃଷ୍ଟିରେ ରଖି ଆଗ ଦଳୀୟ କନ୍ଦଳକୁ ସମାପ୍ତ କରିବା ପାଇଁ ଯୋଜନା କରିଛି ଜାତୀୟ କଂଗ୍ରେସ । ଯଦି ରାଜସ୍ଥାନରେ ସଚିନ ପାଇଲଟଙ୍କ ପୁନଃଆଗମନ ହୁଏ, ତାହାଲେ ଦଳ ପୁଣିଥରେ ଶକ୍ତିଶାଳୀ ହେବ ବୋଲି ଅନୁମାନ କରାଯାଉଛି । ଯଦି ଅନ୍ୟ ରାଜ୍ୟ ଗୁଡ଼ିକ ଦେଖିବା ତାହାଲେ ପଞ୍ଜାବ, ମଧ୍ୟପ୍ରଦେଶ, ଛତିଶଗଡ଼, ଗୁଜରାଟ, ଉତ୍ତରାଖଣ୍ଡ ଏବଂ ହିମାଚଳ ପ୍ରଦେଶରେ କଂଗ୍ରେସ ଶାସକ ଦଳକୁ କଡା ଟକ୍କର ଦେଇଆସୁଛି ।