ଭୁବନେଶ୍ୱର (ବଡ଼ ଖବର ବ୍ୟୁରୋ): ପରାଜୟ ପରେ ଜାଗିଲେ ନବୀନ । ୨୪ ବର୍ଷରେ ଯାହା କରିନଥିଲେ ଏବେ କରିବାକୁ ପଡୁଛି । ପଲିଟିକ୍ସର ଶେଷ ପର୍ଯ୍ୟାୟରେ ଚିନ୍ତାରେ ନବୀନ । ଦଳ ହାରିବା ପରେ ରାସ୍ତାକୁ ଓହ୍ଲାଇଲେ, ଚାଷୀଙ୍କୁ ଭେଟିଲେ । ବିପର୍ଯ୍ୟୟରୁ ବାହାରି ଏବେ ବିଜେଡିକୁ ସଜାଡ଼ିବା ଚିନ୍ତା । ସଙ୍ଗଠନକୁ ସୁଦୃଢ କରିବା ଦିଗରେ ଲାଗିପଡ଼ିଛନ୍ତି ନବୀନ । ଚାଷୀଙ୍କୁ ନ୍ୟାୟ ଦେବାରେ ସରକାରଙ୍କୁ ଘେରିବା ପରେ ଲାଗିଲା ଯେମିତି ନବୀନ ସକ୍ରିୟ ରାଜନୀତି ଏବେ ବେଶୀ ତତ୍ପରତା ଦେଖାଉଛନ୍ତି । ରାଜଧାନୀରେ ସହଦେବ ନାୟକଙ୍କୁ ହତ୍ୟା ପରେ ପରିବାରକୁ ଭେଟିଲେ । ୫୦ ହଜାର ଟଙ୍କା ଦେବା ସହ ପିଲାଙ୍କ ପଢାଇବା ଦାୟିତ୍ୱ ନେଲେ । ଏତିକିରେ ସୀମିତ ନାହାନ୍ତି ନବୀନ । ଛତିଶଗଡ଼ରେ ବିଶାଲ ଦାସଙ୍କୁ ଅଟକ ପରେ ନବୀନ ହଠାତ୍ ଚିଠି ଲେଖିବା ଏହା ଦର୍ଶାଉଛି ଯେ ବିଜେଡିକୁ ଆଗକୁ ନେବା ପାଇଁ ନବୀନ ଏବେ ଆଗଭର । ଦରବୃଦ୍ଧିକୁ ନେଇ ରାଜଧାନୀରେ ବିଜେଡିର ଗର୍ଜନ ପରେ ଏବେ ଚାଷୀଙ୍କ ପାଇଁ ଅଣ୍ଟା ଭିଡ଼ିଛି । ଏ ଦିଗରେ ସଜବାଜ ହେଉଥିବା ଜଣାପଡ଼ିଛି ।
ଏପରିକି ପଶ୍ଚିମ ଓଡ଼ିଶାରେ ଚାଷୀଙ୍କ ପାଇଁ ନବୀନ ପ୍ରତିବାଦ, ବିକ୍ଷୋଭ କରିବାର ଆଭାସ ମିଳିଲାଣି । ଏହା ସହ ସଙ୍ଗଠନକୁ ସଶକ୍ତ କରିବା ଦିଗରେ ମଧ୍ୟ ନବୀନ କାମ କରୁଥିବା ଜଣାପଡୁଛି । ଖୁବଶୀଘ୍ର ବ୍ଲକ ସଭାପତି, ରାଜ୍ୟ କାର୍ଯ୍ୟକାରିଣୀ ସଭ୍ୟ ନିର୍ବାଚନ ହେବ । ଏହାପରେ ଜିଲ୍ଲା ସଭାପତି ଚୟନ ଓ ରାଜ୍ୟ କମିଟି ତିଆରି ହେବ । ଯାହା କୁହାଯାଉଛି ପଣା ସଂକ୍ରାନ୍ତି ସୁଦ୍ଧା ବିଜେଡିର ସମସ୍ତ ପ୍ରକ୍ରିୟା ଶେଷ ହେବ । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ବରିଷ୍ଠ ଓ କନିଷ୍ଠ ନେତାଙ୍କ କଥାକୁ ଗୁରୁତ୍ୱ ଦେବା ସହ ନିଜେ ସମସ୍ତ କାର୍ଯ୍ୟକୁ ତଦାରଖ କରିବାକୁ ଅଂଟା ଭିଡ଼ିଛନ୍ତି କୁହାଗଲାଣି । ଦଳୀୟ ସଙ୍ଗଠନକୁ ନିଜେ ମ୍ୟାନେଜ କରିବାକୁ ପ୍ରୟାସ ଆରମ୍ଭ କରିଥିବା ଭିତିରି ଖବର ଆସିଲାଣି । ମେଳି ବାନ୍ଧିଥିବା ନେତାଙ୍କୁ ବୁଝାଇବା ପାଇଁ ସ୍ୱତନ୍ତ୍ର ଯୋଜନା କରୁଥିବା କୁହାଯାଉଛି । ଦଳର ସମସ୍ତ ସମସ୍ୟାର ସମାଧାନ କରିବା ଦିଗରେ ନବୀନ ନିଜେ କାର୍ଯ୍ୟ କରିବେ । ଭାଙ୍ଗିଯାଇଥିବା ଦଳକୁ ଏକଜୁଟ କରିବା ଯଦିଓ ଏତେ ସହଜ ନୁହେଁ ତଥାପି ଏତେ ବଡ଼ କଷ୍ଟ ବି ନୁହେଁ । ଆଶା କରିବା ବିଜେଡି ସଶକ୍ତ ବିରୋଧୀ ଦଳ ହୋଇ କାର୍ଯ୍ୟ କରୁ । କାରଣ ଗଣତନ୍ତ୍ରରେ ବିରୋଧୀ ଦଳର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
