ଟାଙ୍ଗୀ( ବଡ଼ ଖବର ବ୍ୟୁରୋ): ସଫଳ ହେଲା ବିରଳ ଅସ୍ତ୍ରୋପଚାର । ମହିଳାଙ୍କ ପେଟରୁ ବାହରକରାଗଲା ୫୭କେଜିର ଟ୍ୟୁମର । ଖୋର୍ଦ୍ଧା ଜିଲ୍ଲା କୁହୁଡ଼ି ହାଟ ବରଡ଼ିରେ ଥିବା ସାଇ ସେବା ସଦନରେ ଏଭଳି ଏକ ବିରଳ ଅସ୍ତ୍ରୋପଚାର ସଫଳ ହୋଇଛି । ଦୀର୍ଘ ପାଞ୍ଚଘଣ୍ଟାର ଅପରେସନ ପରେ ମହିଳାଙ୍କ ପେଟରୁ ଏକ ବିରାଟକାୟ ଟ୍ୟୁମରକୁ ବାହାର କରାଯାଇଛି । ନବରଙ୍ଗପୁର ଜିଲ୍ଲା ରାଇଘର ଅଞ୍ଚଳ ଡ଼ିହିଗ୍ରାମର ଫୁଲମତୀ ଗଣ୍ଡ ପେଟରେ ଯନ୍ତ୍ରଣା ଅନୁଭବ କରିବାରୁ ଡାକ୍ତରଙ୍କ ପାଖକୁ ଯାଇଥିଲେ । ପରୀକ୍ଷାରୁ ଜଣାପଡିଲା ତାଙ୍କ ପେଟରେ ଟ୍ୟୁମର ବଢୁଛି । ଆର୍ଥିକ ଅନଟନ ଭିତରେ ଗତି କରୁଥିବା ଫୁଲମତୀଙ୍କ ପରିବାର ଚିକିତ୍ସା ପାଇଁ ଅସମର୍ଥ ଥିଲେ । ଏନେଇ କିଛି ସମାଜସେବୀ ସୋସିଆଲ ମିଡିଆରେ ପୋଷ୍ଟ କରିବା ପରେ ସାଇ ସେବା ସଦନର ମାଲିକ ଏହି ପୋଷ୍ଟ ଦେଖି ନିଜ ଡାକ୍ତରୀ ଟିମ ସହ ପୁଲମତୀଙ୍କ ସହ ଆଲୋଚନା କରିଥିଲେ । ଫୁଲମତୀଙ୍କୁ ମାଗଣା ଚିକିତ୍ସା ଯୋଗାଇଦେବା ପାଇଁ ସାଇ ସେବା ସଦନ ପକ୍ଷରୁ ତାଙ୍କୁ ଆମ୍ବୁଲାନ୍ସ ଯୋଗେ ଘରୁ ଆଣି ଡାକ୍ତର ଖାନରେ ଭର୍ତ୍ତି କରାଯାଇଥିଲା । ଗତକାଲି ସଫଳତାର ସହ ଫୁଲମତୀଙ୍କ ଅପରେସନ ଶେଷ ହୋଇଛି । ଏବେ ସେ ସୁସ୍ଥ ଥିବା ଡାକ୍ତର କହିଛନ୍ତି ।
