ଶରତଙ୍କୁ କାହିଁକି ଦିଆଗଲାନି ରାଷ୍ଟ୍ରୀୟ ମର୍ୟ୍ୟାଦା

ଭୁବନେଶ୍ୱର, (ବଡ଼ ଖବର ବ୍ୟୁରୋ) : ଗତ ୧୨ ତାରିଖରେ ପୂର୍ବତନ ମନ୍ତ୍ରୀ ତଥା ପୂର୍ବତନ ବାଚସ୍ପତିଙ୍କ ଦେହାନ୍ତ ହୋଇଥିଲା। ସେ ଥରେ ସଂସଦ ଓ କଟକ ଜିଲ୍ଲା ମାହାଙ୍ଗାରୁ ତିନିଥର ବିଧାନସଭାକୁ ମଧ୍ୟ ନିର୍ବାଚିତ ହୋଇଥିଲେ। ଶରତ ଜଣେ ସୁସାହିତ୍ୟିକ ମଧ୍ୟ ଥିଲେ। କିନ୍ତୁ ସ୍ୱର୍ଗତ କରଙ୍କୁ ରାଜ୍ୟ ସରକାର ଉଚିତ୍ ସମ୍ମାନ ଦେଇନାହାନ୍ତି। ଏ ନେଇ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ। ନିରଞ୍ଜନ କହିଛନ୍ତି ଯେ ସ୍ୱର୍ଗତ କର ଜଣେ ବରିଷ୍ଠ ରାଜନୀତିଜ୍ଞ ଥିଲେ। ତାଙ୍କ ମୃତ୍ୟୁ ପରେ ପୁରୀ ସ୍ୱର୍ଗଦ୍ୱାରରେ ଅନ୍ତିମ ସଂସ୍କାର କରିବା ପାଇଁ ପରିବାର ଲୋକେ ଅନୁମତି ମାଗିଥିଲେ ମଧ୍ୟ ସରକାର ଦେଲେ ନାହିଁ। ବହୁ ଲୋକଙ୍କୁ ରାଷ୍ଟ୍ରୀୟ ମର୍ୟ୍ୟାଦା ଦିଆଯାଉଛି କିନ୍ତୁ କାହିଁକି ଶରତ କରଙ୍କ ପରି ଜଣେ ବିଶିଷ୍ଟ ବ୍ୟକ୍ତିଙ୍କୁ ସରକାରଙ୍କ ତରଫରୁ ରାଷ୍ଟ୍ରୀୟ ମର୍ୟ୍ୟାଦା ଦିଆଗଲା ନାହିଁ ବୋଲି ନିରଞ୍ଜନ ଚିଠିରେ ଉଲ୍ଲେଖ କରିଛନ୍ତି। କେଉଁମାନଙ୍କ ଅନିୟମିତତା ପାଇଁ ଏଭଳି ଅପମାନସୂଚକ କାର୍ୟ୍ୟ ହୋଇଛି ତାହାର ତଦନ୍ତ କରି ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ନିରଞ୍ଜନ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି ।