ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜଭବନ ନିକଟ ଇଣ୍ଡିଆନ୍ ଅଏଲ ପେଟ୍ରୋଲ ପମ୍ପରେ କିଛି ସମୟ ପୂର୍ବରୁ ନିଆଁ ଲାଗିଛି । ପେଟ୍ରୋଲ ପମ୍ପରେ ହଠାତ୍ ପ୍ରଚଣ୍ଡ ଶବ୍ଦହୋଇ ନିଆଁ ଲାଗିଯାଇଥିଲା । ପମ୍ପ ପରିସରେ ଥିବା ସିଏନଜି ଟାଙ୍କିରେ ବିସ୍ଫୋରଣ ହେବାରୁ ଏହି ଅଗ୍ନିକାଣ୍ଡ ଘଟିଥିବା ସୂଚନା ମିଳିଛି । ବିସ୍ଫୋରଣ ସମୟରେ ପେଟ୍ରୋଲ ପମ୍ପରେ ଉପସ୍ଥିତ ଥିବା ଗ୍ରାହକମାନେ ଗାଡି ଛାଡି ଏଣେତେଣେ ଦୌଡିବାକୁ ଲାଗିଥିଲେ । କେତେକ ଗାଡି ପେଟ୍ରୋଲ ପମ୍ପ ପରିସରରେ ଏବେ ବି ପଡିରହିଥିବା ଦେଖିବାକୁ ମିଳୁଛି । ନିଆଁର ପ୍ରକୋପ ଅତି ପ୍ରଚଣ୍ଡ ହୋଇଛି । ଅଗ୍ନିକାଣ୍ଡ ପରେ ପେଟ୍ରୋଲ ପମ୍ପ ହୁହୁ ହୋଇ ଜଳୁଛି । ନିଆଁ ଲିଭା କାର୍ଯ୍ୟରେ ୫ଟି ଦମକଳ ନିୟୋଜିତ ହୋଇଛି । ଏଥିରେ ପେଟ୍ରୋଲ ପମ୍ପର ୨ କର୍ମଚାରୀଙ୍କ ସମେତ କେତେଜଣ ଗ୍ରାହକ ମଧ୍ୟ ଗୁରୁତର ଆହତ ହୋଇଛନ୍ତି । ସେମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଜଣେ ପେଟ୍ରେଲ ପମ୍ପ କର୍ମଚାରୀଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ଥିବାରୁ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ତାଙ୍କ ନାଁ ସତ୍ୟ ନାଥ ବୋଲି ସୂଚନା ରହିଛି। ପୋଲିସ ସ୍ଥାନୀୟ ଅଞ୍ଚଳକୁ ଚାରିପଟୁ ଘେରି ରହିଛି ।
