ଏପ୍ରିଲ ୧୭ ରେ ପିପିଲି ଭୋଟ

ପିପିଲି(ବଡ଼ ଖବର ବ୍ୟୁରୋ): ଏପ୍ରିଲ ୧୭ରେ ପିପିଲି ବିଧାନସଭା ଆସନ ପାଇଁ ପଡିବ ଭୋଟ । ଏନେଇ ବିଧିବଦ୍ଧ ଘୋଷଣା କରିଛନ୍ତି ମୁଖ୍ୟନିର୍ବାଚନ କମିସନ। ମାର୍ଚ୍ଚ ୨୩ ତାରିଖରେ ଏନେଇ ବିଜ୍ଞପ୍ତି ପ୍ରକାଶ ପାଇବ । ସେହିପରି ମାର୍ଚ୍ଚ ୩୦ରେ ନାମାଙ୍କନ ଦାଖଲର ଶେଷ ତାରିଖ ଥିବା ବେଳେ ମାର୍ଚ୍ଚ ୩୧ରେ ପ୍ରାର୍ଥୀପତ୍ର ଯାଞ୍ଚ ହେବ । ଏପ୍ରିଲ ୩ରେ ନାମାଙ୍କନ ପ୍ରତ୍ୟାହାରର ଶେଷ ତାରିଖ ରହିଛି । ଏପ୍ରିଲ ୧୭ରେ ଭୋଟ ପଡିବା ସହ ମେ ୨ ତାରିଖରେ ଫଳ ଘୋଷଣା ହେବ । ଦୀର୍ଘ ଦିନ ଧରି ଲାଗିରହିଥିବା ସସପେନ୍ସ ପରେ ଶେଷରେ ତାରିଖ ଘୋଷଣା ହୋଇଛି । ଏହାକୁ ନେଇ ବିଭିନ୍ନ ଦଳ ମଧ୍ୟ ପ୍ରତିକ୍ରିୟା ରଖିଛନ୍ତି ।

ପ୍ରଦୀପ ମହାରଥୀଙ୍କ ଦେହାନ୍ତ ପରେ ଦୀର୍ଘ ଦିନ ଧରି ପିପିଲି ଆସନ ଖାଲି ପଡିଥିଲା । ସେ ଲଗାତର ଭାବେ ବିଧାନସଭାକୁ ନିର୍ବାଚିତ ହୋଇ ଆସୁଥିବା ବେଳେ ତାଙ୍କ ଦଳ କାହାକୁ ପ୍ରାର୍ଥୀ କରିବ ତାକୁ ନେଇ ପ୍ରତିଯୋଗିତା ଆରମ୍ଭ ହୋଇଛି । ବିଜେଡି ମହାରଥୀ ପରିବାରରୁ କାହାକୁ ଟିକେଟ ଦେବେ ନାଁ ଆଉ କିଏ ଟିକେଟ ପାଇବେ ତାକୁ ଅପେକ୍ଷା ଥିବା ବେଳେ ଅନ୍ୟ ଦୁଇ ଦଳରେ ମଧ୍ୟ ସମାନ ସ୍ଥିତି । ବିଜେପି ପୂର୍ବରୁ ପ୍ରାଥୀ ଥିବା ଆଶ୍ରିତ ପଟ୍ଟନାୟକଙ୍କୁ ପୁଣି ଥରେ ସୁଯୋଗ ଦେଇପାରେ । ସେହିଭଳି କଂଗ୍ରେସ ମଧ୍ୟ କାହାକୁ ପ୍ରାର୍ଥୀ କରୁଛି ତାକୁ ଅପେକ୍ଷା ରହିଛି ।