ବିଦ୍ୟାଳୟ ଖୋଲିବା ଦାବୀରେ ଧାରଣା

ବିଦ୍ୟାଳୟ ଖୋଲିବା ଦାବୀରେ ବିଇଓ କାର୍ୟ୍ୟାଳୟ ସମ୍ମୁଖରେ ଛାତ୍ରଛାତ୍ରୀ ଓ ଅଭିଭାବକଙ୍କ ଧାରଣା । ଆସିକା ବ୍ଲକ କାଳଷଣ୍ଡପୁର ପଚାଂୟତ ଚିନିଶିଳ୍ପ ନୂଆଗାଁରେ ଗୋଟିଏ ପାଚେରୀ ମଧ୍ୟରେ ଚିନିଶିଳ୍ପ ଉଚ୍ଚ ବିଦ୍ୟାଳୟ, ଚିନିଶିଳ୍ପ ପ୍ରାଥମିକ ବିଦ୍ୟାଳୟ ଓ ଚିନିଶିଳ୍ପ ସରକାରୀ ଅନୁଦାନପ୍ରାପ୍ତ ଉଚ୍ଚ ପ୍ରାଥମିକ ବିଦ୍ୟାଳୟରେ ଛାତ୍ରଛାତ୍ରୀ ଅଧ୍ୟୟନ କରୁଥିଲେ । ଏହାଦ୍ୱାରା ନୂଆଗାଁରେ ଛାତ୍ରଛାତ୍ରୀ ବିଶେଷଭାବେ ଉପକୃତ ହେଉଥିଲେ । କିନ୍ତୁ ଚଳିତ ଶିକ୍ଷାବର୍ଷ ଠାରୁ ଏଠାରୁ ଥିବା ଅନୁଦାନପ୍ରାପ୍ତ ଉଚ୍ଚ ପ୍ରାଥମିକ ବିଦ୍ୟାଳୟକୁ କେହି ଶିକ୍ଷକ ନଥିବା ଦର୍ଶାଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ବନ୍ଦ କରିଦିଆଯାଇଛି । ଏବଂ ପଚଂମ ଶ୍ରେଣୀ ଓ ଷଷ୍ଠ ଶ୍ରେଣୀକୁ ପାସ କରିଥିବା ପ୍ରାୟ ୬୦ ଜଣ ଛାତ୍ରଛାତ୍ରୀଙ୍କୁ ତିନି କିଲୋମିଟର ଦୂରରେ ଥିବା ଅନ୍ୟ ଏକ ବିଦ୍ୟାଳୟରେ ନାମ ଲେଖାଇବାକୁ ନିର୍ଦ୍ଧେଶ ଜାରି ହୋଇଛି । ଏହାକୁ କେନ୍ଦ୍ର କରି ଚିନିଶିଳ୍ପ ନୂଆଗାଁର ଛାତ୍ରଛାତ୍ରୀ ଓ ଅଭିଭାବକ ମାନେ ପ୍ରତିବାଦର ସ୍ୱର ଉଠାଇଛନ୍ତି । ଗତକାଲି ସୋମାବାର ଦିନ ଆସିକା ଗୋଷ୍ଠୀ ଶିକ୍ଷାଅଧିକାରୀଙ୍କ କାର୍ୟ୍ୟାଳୟ ସମ୍ମୁଖରେ ଧାରଣା ଦେବା ସହ ତୁରନ୍ତ ବନ୍ଦ ବିଦ୍ୟାଳୟକୁ ପୁନଃ କାର୍ୟ୍ୟକ୍ଷମ କରିବା ଏବଂ ଖୋଲିବାକୁ ଦାବୀ କରାଯାଇଥିଲା ।