ଏଣିକି ମହିଳାମାନେ ଏନଡ଼ିଏରେ ଯୋଗ ଦେଇପାରିବେ: ସୁପ୍ରିମକୋର୍ଟ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦେଶର ମହିଳାମାନଙ୍କୁ ନେଇ ଐତିହାସିକ ନିଷ୍ପତ୍ତି ନେଇଛନ୍ତି ସୁପ୍ରିମକୋର୍ଟ । ତେବେ ଭାରତର ସଶସ୍ତ୍ର ବାହିନୀରେ ସ୍ଥାୟୀ ଆୟୋଗ ପାଇଁ ମହିଳାମାନଙ୍କୁ ନ୍ୟାସନାଲ ଡ଼ିଫେନ୍ସ ଏକାଡ଼େମୀରେ ଭର୍ତ୍ତି କରାଯାଇ ପାରିବ ବୋଲି ଦେଶର ସବୋର୍ଚ୍ଚ କୋର୍ଟ କହିଛନ୍ତି । ଏ ସମ୍ପର୍କରେ ବିସ୍ତୃତ ବିବରଣୀ ଦେବା ଲାଗି ସୁପ୍ରିମକୋର୍ଟଙ୍କ ପକ୍ଷରୁ ସରକାରଙ୍କୁ ୨ ସପ୍ତାହ ସମୟ ପ୍ରଦାନ କରାଯାଇଛି ।
ସେପ୍ଟେମ୍ବର ୨୦ ତାରିଖ ସୁଦ୍ଧା ଏହାର ଉତ୍ତର ଦାଖଲ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ଏହା ପରେ ସମଗ୍ର ପ୍ରକ୍ରିୟା ସ୍ପଷ୍ଟ ହେବ । ଏନଡ଼ିଏ ଏବଂ ନାଭାଲ ଏକାଡ଼େମୀରେ ମହିଳା କ୍ୟାଡ଼େଟଙ୍କ ପ୍ରବେଶ ପାଇଁ ସରକାର ନୀତି ଏବଂ ପଦ୍ଧତି ସ୍ଥିର କରୁଛନ୍ତି । ଅପରପକ୍ଷରେ ମହିଳା କ୍ୟାଡ଼େଟମାନେ ଏହି ଉଭୟ ସଂସ୍ଥାରେ ପ୍ରଶିକ୍ଷଣ ପାଇବେ । ଏହାପରେ ସେମାନଙ୍କ ସ୍ଥାୟୀ କମିଶନ ପ୍ରଦାନ କରାଯିବ । କିନ୍ତୁ କେଉଁ ପ୍ରକ୍ରିୟା ଅଧୀନରେ ଏହାକୁ ଚୂଡ଼ାନ୍ତ ରୂପ ଦିଆଯିବ ଖୁବ ଶୀଘ୍ର ତାହା ନିର୍ଣ୍ଣୟ କରାଯିବ ବୋଲି ସୂଚନା ମିଳିଛି ।