ନେଟ ବୋଲରରୁ ଟେଷ୍ଟ ବୋଲର
ଭୁବନେଶ୍ୱର(ବଡ଼ ଖବର ବ୍ୟୁରୋ): ୟର୍କର କିଙ୍ଗ ଭାବେ ପରିଚିତ ଟି-ନଟରାଜନ ଶୁକ୍ରବାର ନିଜର ଟେଷ୍ଟ ଡେବ୍ୟୁ କରିଛନ୍ତି । ନେଟ ବୋଲର ଭାବରେ ଅଷ୍ଟ୍ରେଲିଆକୁ ଆସିଥିବା ନଟରାଜନ ଅଷ୍ଟ୍ରେଲିଆ ଗସ୍ତରେ ସମସ୍ତ ଫର୍ମାଟରେ ଡେବ୍ୟୁ କରିଛନ୍ତି । ଭାରତ-ଅଷ୍ଟ୍ରେଲିଆ ଚତୁର୍ଥ ଟେଷ୍ଟରେ ନଟରାଜନ ଭାରତ ପକ୍ଷରୁ ଡେବ୍ୟୁ କରିଛନ୍ତି । ୩୦୦ ତମ ଖେଳାଳି ଭାବେ ନଟରାଜନ ଭାରତ ପାଇଁ ଡେବ୍ୟୁ କରିଛନ୍ତି । ଯଶପ୍ରୀତ ବୁମ୍ରା ଆହାତ ହୋଇ ଚତୁର୍ଥ ଟେଷ୍ଟରୁ ବାହାର ହେବା ପରେ ନଟରାଜନଙ୍କୁ ସ୍ଥାନ ମିଳିଛି । ନଟରାଜନ ଦଳକୁ ଆସିବା ପରେ ୨୦୧୪ ମସିହା ପରେ ପ୍ରଥମ ଥର ପାଇଁ ଭାରତୀୟ ଦଳରେ ଏକ ବାମହାତୀ ବୋଲର ସାମିଲ ହୋଇଛନ୍ତି । ଭାରତ-ଅଷ୍ଟ୍ରେଲିଆ ଚଦିନିକିଆ ସିରିଜରେ ନବଦୀପ ସାଇନଙ୍କ ସ୍ଥାନରେ ଦଳରେ ସାମିଲ ହୋଇଥିଲେ ନଟରାଜନ ।
ପରେ ଭାରତ-ଅଷ୍ଟ୍ରେଲିଆ ଟି-୨୦ ସିରିଜରେ ବରୁଣ ଚକ୍ରବତି ଆହାତ ହୋଇ ଏହି ସିରିଜରୁ ବାହାରିବା ପରେ ଟି ନଟରାଜନଙ୍କୁ ଭାରତୀୟ ଦଳରେ ସାମିଲ କରାଯାଇଥିଲା । ନଟରାଜନ ଟି-୨୦ରେ ଦମଦାର ପ୍ରଦର୍ଶନ କରିଥିଲେ । ୩ଟି ଟି-୨୦ ଖେଳି ୬ ୱିକଟେ ଅକ୍ତିଆର କରିଥିଲେ ନଟରାଜନ । ଦ୍ୱିତୀୟ ଟେଷ୍ଟରେ ଉମେଶ ଯାଦବ ଆହାତ ହେବା ପରେ ନଟରାଜନଙ୍କୁ ଭାରତୀୟ ଟେଷ୍ଟ ଦଳରେ ସାମିଲ କରାଯାଇଥିଲା । ନିଜର ଟେଷ୍ଟ ପର୍ଦାପଣର ପ୍ରଥମ ଦିନରେ ୨ଟି ବଡ଼ ୱିକେଟ ଅକ୍ତିଆର କରିଥିଲେ ନଟରାଜନ । ସେଟ ବ୍ୟାଟ୍ସମ୍ୟାନ ମାର୍ଲସ ଲାବୁସାନେ ଓ ମ୍ୟାଥ୍ୟୁ ୱେଡଙ୍କୁ ପ୍ୟାଭିଲିୟନ ପଠାଇଥିଲେ । ନଟରାଜନଙ୍କ ଏହି ଦମଦାର ବୋଲିଂ ପାଇ ନଟରାଜନଙ୍କୁ ଚଳିତ ବର୍ଷ ହେବାକୁ ଥିବା ଟି-୨୦ ବିଶ୍ୱକପର ଏକ ଦାବିଦାର ବୋଲର ଅଂଶ ବୋଲି ବିବେଚନା କରାଯାଉଛି । ନଟରାଜନ ଏପରି ବୋଲିଂ କରି ଏମିତି ଦେଶ ପାଇଁ ଅନେକ ଗୌରବ ଆଣନ୍ତୁ ଏତିକି ଆଶା କରାଯାଉଛି ।