୧୬ରୁ ପୁଣି ବଢ଼ିବ ତାପମାତ୍ରା
ଭୁବନେଶ୍ୱର (ବଡ଼ ଖବର ବ୍ୟୁରୋ): ୧୬ରୁ ପୁଣି ବଢ଼ିବ ତାପମାତ୍ରା । ୩୬-୩୭ ଡିଗ୍ରୀ ସେଲସିୟସ୍ ପହଞ୍ଚିପାରେ ବିଭିନ୍ନ ସ୍ଥାନର ଦିନ ତାପମାତ୍ରା । ସେପଟେ ଶୁକ୍ରବାର କମିବ ରାତି ତାପମାତ୍ରା । ଦିନ ତାପମାତ୍ରା ବି ଅଳ୍ପ ଖସିବ । ସାମୟିକ ଭାବେ ଗରମ ପ୍ରକୋପରୁ ସାମାନ୍ୟ ଆଶ୍ୱସ୍ତି ମିଳିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ଆସନ୍ତା ୧୪ ଓ ୧୫ ତାରିଖରେ ରାଜ୍ୟରେ ତାପମାତ୍ରା ସାମାନ୍ୟ କମିବ । ଗରମ ପ୍ରକୋପ ବି କମିବ । ହେଲେ ପାଣିପାଗ ବିଭାଗ ଅନୁସାରେ, ବର୍ତ୍ତମାନ ରାତି ତାପମାତ୍ରା ୨ରୁ ୩ ଡିଗ୍ରୀ କମିବା ସମ୍ଭାବନା ଅଛି ।
ଅନ୍ୟପଟେ ବୁଧବାର ତାପମାତ୍ରା ୩୭ ଡିଗ୍ରୀ ସେଲସିୟସ୍ ଛୁଇଁଥିଲା । ଗୁରୁବାର ତାପମାତ୍ରା ୩୫ ଡିଗ୍ରୀ ପାଖାପାଖି ରହିଛି । ଚଳିତ ବର୍ଷ ପ୍ରଥମ ଥର ପାଇଁ ଭୁବନେଶ୍ୱରର ଦିନ ତାପମାତ୍ରା ୩୫ ଡିଗ୍ରୀ ଅତିକ୍ରମ କରି ୩୫.୪ ଡିଗ୍ରୀରେ ପହଞ୍ଚିଥିଲା । ଯାଜପୁର ତାପମାତ୍ରା ୩୫.୨, ବରଗଡ଼ ୩୫.୧, ଖୋର୍ଦ୍ଧା ୩୫, ଜଗତସିଂହପୁର ୩୫, ମାଲକାନଗିରି ୩୫, ଝାରସୁଗୁଡ଼ା ୩୫, ଢେଙ୍କାନାଳ ୩୪.୯ ଡିଗ୍ରୀ ଥିଲା । ହୀରାକୁଦ, ଛତ୍ରପୁର, ଟିଟିଲାଗଡ଼, ବଲାଙ୍ଗିର, ଭବାନୀପାଟଣାରେ ପାରଦ ୩୪ ଡିଗ୍ରୀ ଉପରେ ଥିଲା ।