କୋର୍ଟରେ ପ୍ରେମିକା ବୟାନ ବଦଳେଇବାରୁ ବିଷ ପିଇଲା ପ୍ରେମିକ

ଜଳେଶ୍ୱର(ବଡ଼ ଖବର ବ୍ୟୁରୋ) : ପ୍ରେମରେ ବିଫଳ ହୋଇ ଆତ୍ମହତ୍ୟା ଉଦ୍ୟମ କଲା ପ୍ରେମିକ । କୋର୍ଟ ପରିସରରେ ଜଜଙ୍କ ସାମ୍ନାରେ ପ୍ରେମିକାର ବୟାନ ରେକର୍ଡ ଚାଲିଥିବା ସମୟରେ ବିଷ ପିଇ ଆତ୍ମହତ୍ୟା ଉଦ୍ୟମ କଲା ପ୍ରେମିକ ।  ଅବସ୍ଥା ଗୁରୁତର ହେବାରୁ ତାଙ୍କୁ ବାଲେଶ୍ୱର ହସପିଟାଲକୁ ସ୍ଥାନାନ୍ତର କରାଯାଇଛି । ତେବେ ପ୍ରେମିକା ଜଣକ ତା ଘରକୁ ଫେରି ଯାଇଛି ।

ସୂଚନା ଅନୁଯାୟୀ, ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ଅନ୍ତର୍ଗତ ନଛିମପୁର ଗ୍ରାମର ଜନୈକା ଯୁବତୀ ଅନ୍ୟ ଏକ ଗ୍ରାମର ଯୁବକକୁ ପ୍ରେମ କରି ୧୫ ଦିନ ପୂର୍ବରୁ ଘରୁ ଫେରାର ହୋଇଯାଇ କୋର୍ଟ ମ୍ୟାରେଜ କରିଥିଲା । ଏନେଇ ଯୁବତୀଙ୍କ ପରିବାର ପକ୍ଷରୁ ମାମଲା ରୁଜୁ ହୋଇଥିଲା । ଏହାପରେ ଜଳେଶ୍ୱର ପୋଲିସ ବିଭିନ୍ନ ସ୍ଥାନରେ ଚଢଉ କରି ପ୍ରେମୀଯୁଗଳଙ୍କୁ ଉଦ୍ଧାର କରିଥିଲା । ତେବେ ଆଜି କୋର୍ଟରେ ଯୁବତୀର ବୟାନ ରେକର୍ଡ ସମୟରେ ଯୁବତୀ ଜଣଙ୍କ ନିଜ ମତ ବଦଳେଇବା ପରେ ଯୁବକ ଜଣକ ଜଜଙ୍କ ସାମ୍ନାରେ ବିଷ ପିଇ ଆତ୍ମହତ୍ୟା ଉଦ୍ୟମ କରିଛି ।