ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ପୁଣି ବଢ଼ିଲା ରନ୍ଧନ ଗ୍ୟାସର ଦାମ । ଦେଶରେ ଅହେତୁକ ଭାବେ ବଢ଼ୁଥିବା ଦାମକୁ ନେଇ ଚିନ୍ତାରେ ଖାଉଟି । ତେବେ ସବସିଡି ସିଲିଣ୍ଡିର ମୂଲ୍ୟ ୨୫ଟଙ୍କା ବଢ଼ିଥିବା ବେଳେ ବ୍ୟବସାୟିକ ଗ୍ୟାସ ସିଲିଣ୍ଡର ୬୮ଟଙ୍କା ବଢ଼ିଛି । ବର୍ତ୍ତମାନ ଭୁବନେଶ୍ୱରରେ ୧୯ କେଜି ଗ୍ୟାସ ସିଲିଣ୍ଡର ୧୭୫୦ ଟଙ୍କା ୫୦ ପଇସା ରହିଛି ।
ସେହିଭଳି ୧୪.୨ କେଜିର ସିଲିଣ୍ଡର ମୂଲ୍ୟ ୮୮୬ ଟଙ୍କା ରହିଛି । ତେବେ ପ୍ରତି ମାସ ପହିଲାରେ ଏଲପିଜିର ଦାମ ବଢ଼ାଉଛନ୍ତି କେନ୍ଦ୍ର ସରକାର । ତେବେ ଅଗଷ୍ଟ ମାସ ପହିଲାରୁ ଗ୍ୟାସର ଦାମ ବୃଦ୍ଧି ନହେବାର ପ୍ରମୁଖ କାରଣ ଥିଲା ଦେଶର ବିଭିନ୍ନ ରାଜନୈତିକ ଦଳ ଦରଦାମ ବୃଦ୍ଧିକୁ ନେଇ ପ୍ରତିବାଦ କରୁଥିଲେ ।
ଏହାଛଡ଼ା ସଂସଦରେ ମୌସୁମୀ ଅଧିବଶେନ ମଧ୍ୟ ଚାଲିଥିଲା, ଆଉ ଏହା ମଧ୍ୟରେ ଦାମ ବଢ଼ାଇ କନ୍ଦଳ ମଧ୍ୟକୁ ଆସିବାକୁ ଚାହୁଁନଥିଲେ କେନ୍ଦ୍ର ସରକାର । ଗତ ୯ମାସ ମଧ୍ୟରେ ୨୭୫ଟଙ୍କା ବଢ଼ିଲାଣି ସିଲିଣ୍ଡର ଦାମ । ୨୦୨୧ ଜାନୁଆରୀରେ ଏଲପିଜି ସିଲିଣ୍ଡର ଦାମ ରହିଥିଲା ୬୯୪ଟଙ୍କା । ଏବେ ଅଗଷ୍ଟ ସୁଦ୍ଧା ବୃଦ୍ଧି ହୋଇ ଏହି ଦାମ ୮୮୬ ଟଙ୍କାରେ ପହଞ୍ଚିଛି ।
