ବରଗଡ଼ (ବଡ଼ ଖବର ବ୍ୟୁରୋ): ଦଳିତଙ୍କ ନିତ୍ୟ ବ୍ୟବହାର୍ଯ୍ୟ ଚାଲୁଥିବା ରାସ୍ତାକୁ ଲିଜ ସୂତ୍ରରେ ନେଇଛନ୍ତି ଧନୀକ,ମୁଷ୍ଟିମେୟ ଶ୍ରେଣୀର ଲୋକେ । ଏଭଳି ଘଟଣା ଦେଖିବାକୁ ମିଳିଛି ବରଗଡ ଜିଲ୍ଲା,ଗାଇସିଲେଟ ବ୍ଲକ ଗୌରେନମୁଣ୍ତା ଗ୍ରାମରେ । ଗୌରେନମୁଣ୍ତା ଗ୍ରାମର ହରିଜନ ପଡାଟି ୫୦ ପରିବାର ବିଶିଷ୍ଟ ବସ୍ତିଟିଏ, କେଉଁ ଆବହମାନ କାଳରୁ ରହି ଆସିଛି ।
ହରିଜନ ପଡାରୁ ଗ୍ରାମର ମୁଖ୍ୟ ରାସ୍ତାକୁ ସଂଯୋଗ କରୁଥିବା ରାସ୍ତାକୁ ଦୁଇ ଜଣ ଧନୀକ ଶ୍ରେଣୀର ଲୋକ,୧୯୮୩ ମସିହାରୁ ନିଜ ନାମରେ ଲିଜ ସୂତ୍ରରେ ନେଇ ଯାଇଛନ୍ତି । ସେମାନେ ହେଲେ କୃପାସିନ୍ଧୁ ସାହୁ ଏବଂ କୁମ୍ପଟିଆ ସାହୁ । ଉଭୟଙ୍କର ମୋଟ ଚାଷ ଜମି ୫୦ ଏକରରୁ ଅଧିକ ଅଛି । ତେବେ ସରକାର କିପରି ଏଭଳି ବ୍ୟକ୍ତିଙ୍କୁ ଚାଲିବା ରାସ୍ତାକୁ ଲିଜ ସୂତ୍ରରେ ଦେଲେ ବୋଲି ଅଭିଯୋଗ କରିଛନ୍ତି ଗୌରେନମୁଣ୍ତା ଗ୍ରାମର ହରିଜନ ପଡାବାସୀ ।
ସେମାନଙ୍କର ଚାଲିବା ରାସ୍ତା ବର୍ତ୍ତମାନ ସଂକୀର୍ଣ୍ଣ ହେବାରେ ଲାଗିଛି । ପାଣି ପାଇପକୁ ଭାଙ୍ଗି ଦେଇଛନ୍ତି ଲିଜଧାରୀ ବ୍ୟକ୍ତି । ଫଳରେ ପଡାବାସୀ ପାଣି ପାଇବାରୁ ବଞ୍ଚିତ ହୋଇଛନ୍ତି । ଦଳିତ ବ୍ୟକ୍ତିମାନେ ଲିଜ ବାତିଲ କରିବା ପାଇଁ ବାରମ୍ବାର ଗାଇସିଲେଟ ତହସିଲଦାର, ପଦ୍ମପୁର ଉପ‐ଜିଲ୍ଲାପାଳ, ବରଗଡ ଜିଲ୍ଲାପାଳଙ୍କୁ ଲିଖିତ ଭାବେ ଜଣାଇ ସାରିଲେଣି କିନ୍ତୁ କିଛି ସମାଧାନର ରାସ୍ତା ବାହାରି ପାରି ନାହିଁ ।
