ଅତୁଟ ବନ୍ଧନ: ସ୍ତ୍ରୀର ଜୁଇକୁ ଡେଇଁ ସ୍ୱାମୀ ମୃତ
କଳାହାଣ୍ଡି (ବଡ଼ ଖବର ବ୍ୟୁରୋ): ସ୍ତ୍ରୀର ଜୁଇକୁ ଡେଇଁ ସ୍ୱାମୀ ମୃତ । ସ୍ତ୍ରୀର ମୃତ୍ୟୁକୁ ସହିପାରିଲାନି ସ୍ୱାମୀ । ଶେଷରେ ସ୍ତ୍ରୀର ଜୁଇକୁ ଡେଇଁ ଜୀବନ୍ତ ଦଗ୍ଧ ହୋଇ ପ୍ରାଣ ହରାଇଛନ୍ତି ସ୍ବାମୀ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକର ସିଆଲଯୋଡ଼ି ଗ୍ରାମରେ।
ମଙ୍ଗଳବାର ଗ୍ରାମର ନୀଳମଣି ଶବରଙ୍କ ସ୍ତ୍ରୀ ରଏବାରୀ ଶବରଙ୍କ ହୃତଘାତରେ ମୃତ୍ୟୁ ହୋଇଥିଲା। ତାଙ୍କର ୪ ପୁଅ ଓ ଆତ୍ମୀୟମାନେ ଆସିବା ପରେ ଶବ ସତ୍କାର କରିବାକୁ ଗାଁ ଶ୍ମଶାନକୁ ନେଇଥିଲେ। ରଏବାରୀଙ୍କ ଜୁଇ ଜଳିବା ପରେ ସମସ୍ତେ ସ୍ନାନ କରି ଘରକୁ ଫେରିଥିଲେ। ସେଠାରେ ତାଙ୍କ ସ୍ୱାମୀ , ଆଉ ୨ଜଣ ଜଗିଥିଲେ। ମାନସିକ ଭାରସାମ୍ୟ ହରାଇ ହଠାତ୍ ଜୁଇ ଉପରକୁ ନୀଳମଣି ଡେଇଁପଡ଼ି ଜୀବନ୍ତ ଦଗ୍ଧ ହୋଇଥିଲେ।
ନିଆଁ ହୁ ହୁ ହୋଇ ଜଳୁଥିବାରୁ ତାଙ୍କୁ ବଞ୍ଚାଇବାକୁ କେହି ସାହାସ କରି ପାରିନଥିଲେ। ତୁରନ୍ତ ତାଙ୍କର ୪ ପୁଅ, ଗ୍ରାମବାସୀ ଶ୍ମଶାନକୁ ଯାଇଥିଲେ। ସ୍ତ୍ରୀର ଜୁଇକୁ ସ୍ବାମୀ ଡେଇଁବା ଘଟଣା ଜଣାପଡ଼ିବା ପରେ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି।
