୪ ଜିଲ୍ଲାରେ ପ୍ରବଳ ବର୍ଷିବ !
ଭୁବନେଶ୍ୱର(ବଡ଼ ଖବର ବ୍ୟୁରୋ): ଉତ୍ତର ଓଡ଼ିଶା ଉପରେ ଏକ ଘୂର୍ଣ୍ଣି ବଳୟ ସକ୍ରିୟ ରହିଛି । ଯାହାର ପ୍ରଭାବରେ ରାଜ୍ୟରେ ବର୍ଷା ଲାଗି ରହିଛି । ଆସନ୍ତା ୨୪ ଘଣ୍ଟାରେ ୪ ଜିଲ୍ଲାରେ ଅତି ପ୍ରବଳ ବର୍ଷା ହେବ । କିଛି ସ୍ଥାନରେ ଅତି ପ୍ରବଳ ବର୍ଷା ନେଇ ସତର୍କତା ଜାରି କରିଛି ପାଣିପାଗ ବିଭାଗ । ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼ ଓ ସମ୍ବଲପୁରକୁ ସତର୍କତା ଜାରି । ଗୋଟିଏ ପରେ ଗୋଟିଏ ଘୂର୍ଣ୍ଣିବଳୟ ବର୍ଷା ଜାରି ରହିଥିବାବେଳେ ଆହୁରି ଦୁଇଟି ଘୂର୍ଣ୍ଣିବଳୟ ଆଗପଛ ହୋଇ ଆସୁଛି। ନିର୍ଧୁମ ଢାଳିବ ବର୍ଷା। ବର୍ତ୍ତମାନ ଉତ୍ତର ଓଡ଼ିଶା ଏବଂ ପାଶ୍ୱର୍ବର୍ତ୍ତୀ ଗାଙ୍ଗେୟ ପଶ୍ଚିମବଙ୍ଗ ଉପରେ ଘୂର୍ଣ୍ଣିବଳୟ ଅଛି । ଏହା ପ୍ରଭାବରେ ରାଜ୍ୟରେ ବର୍ଷା ଲାଗି ରହିଛି । ବିଭିନ୍ନ ମଡେଲକୁ ଅନୁଶୀଳନ କରି ଆଗାମୀ ଦୁଇ ସପ୍ତାହ ପାଇଁ ଭାରତୀୟ ପାଣିପାଗ ବିଭାଗ ପୂର୍ବାନୁମାନ ଜାରି କରିଛି । ଏହି ପୂର୍ବାନୁମାନ କହୁଛି, ଆସନ୍ତା ୬ ତାରିଖ ବେଳକୁ ଉତ୍ତର ବଙ୍ଗୋପସାଗର, ପାଶ୍ୱର୍ବର୍ତ୍ତୀ ଉପକୂଳ ପଶ୍ଚିମବଙ୍ଗ ଓ ବାଂଲାଦେଶ ଉପରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ। ଏହା ୩-୪ ଦିନ ଭିତରେ ପଶ୍ଚିମ ଉତ୍ତର ପଶ୍ଚିମ ଦିଗରେ ଗାଙ୍ଗେୟ ପଶ୍ଚିମବଙ୍ଗ, ଉତ୍ତର ଓଡ଼ିଶା, ଝାଡ଼ଖଣ୍ଡ ଓ ପୂର୍ବ ମଧ୍ୟପ୍ରଦେଶ ଆଡ଼କୁ ଗତି କରିବା ସମ୍ଭାବନା ଅଛି।
ସେହିପରି ଜୁଲାଇ ୧୧ରୁ ୧୭ ତାରିଖ ଭିତରେ ଆଉ ଏକ ଘୂର୍ଣ୍ଣିବଳୟ ହୋଇପାରେ ଉତ୍ତର ବଙ୍ଗୋପସାଗର ଓ ପାଶ୍ୱର୍ବର୍ତ୍ତୀ ଉପକୂଳ ପଶ୍ଚିମବଙ୍ଗ-ଓଡ଼ିଶା ଏବ ବାଂଲାଦେଶ ଉପରେ। ଏବେ ଗୋଟିଏ ଘୂର୍ଣ୍ଣିବଳୟ ଥିବାବେଳେ ଆଗକୁ ଆଗ ପଛ ହୋଇ ଆଉ ଦୁଇଟି ଘୂର୍ଣ୍ଣିବଳୟ ଓଡ଼ିଶା ମୁହାଁ ହେବେ। ଏଥିରୁ ସ୍ପଷ୍ଟ-ଓଡ଼ିଶାରେ ବର୍ତ୍ତମାନ ଶୁଖିଲା ପାଗ ଆଶା କମ୍ । ସେପଟେ ଏ ବର୍ଷ ଆଗୁଆ ଆସିଥିବା ମୌସୁମୀ ଆରମ୍ଭରୁ ଧକାଉଥିଲା । ରଜ ଯାଏ ମୌସୁମୀ ଦୁର୍ବଳ ହୋଇ ପଡ଼ିଥିଲା। ଜୁନ୍ ୨୦ ପରେ ମୌସୁମୀର ପ୍ରକୋପ ଦେଖିବାକୁ ମିଳିଛି । ଯେତିକି ନିଅଣ୍ଟିଆ ସ୍ଥିତି ଥିଲା, ସବୁ ଭରଣା କରିଦେଲା ଏଇ ସପ୍ତାହରେ। ଜୁନ୍ ୨୬ରୁ ଜୁଲାଇ ୨ ଭିତରେ ରାଜ୍ୟରେ ଯେତିକି ବର୍ଷା ହେବା କଥା, ତା’ଠାରୁ ୧୦୦% ଅଧିକ ବର୍ଷା ଅଜାଡ଼ିଛି । ବର୍ତ୍ତମାନ ସ୍ଥିତି ଏଇଆ- ଜୁନ୍ ପହିଲାରୁ ଏଯାଏଁ ରାଜ୍ୟରେ ୨୯% ଅଧିକ ବର୍ଷା ହୋଇଛି । ୩ଟି ଜିଲ୍ଲା ପୁରୀ, ଗଜପତି, ନୂଆପଡ଼ାରେ ବର୍ଷା ସାମାନ୍ୟ ନିଅଣ୍ଟିଆ ଥିବାବେଳେ ୨୭ ଜିଲ୍ଲାରେ ଭଲ ବର୍ଷା ହୋଇଛି । ଜୁଲାଇରୁ ବି ପ୍ରବଳ ବର୍ଷା ଆଶା ଦେଖାଇଛି ପାଣିପାଗ ବିଭାଗ ।