ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦୁଇ ଦୁଇ ଥର ବିଶ୍ୱ ଚମ୍ପିଆନ ହୋଇଥିବା ୱେଷ୍ଟଇଣ୍ଡିଜ ଟିମକୁ ଲାଗିଛି ସବୁଠାରୁ ବଡ଼ ଝଟକା । ଏକଦା ଅନ୍ତର୍ଜାତୀୟ କ୍ରିକେଟ ଜଗତରେ ରାଜ କରୁଥିବା ଓ୍ବେଷ୍ଟଇଣ୍ଡିଜ ଦଳ ଆସନ୍ତା ବିଶ୍ବକପରୁ ବାଦ ପଡ଼ିଛି । ୧୯୭୫ ଓ ୧୯୭୯ରେ ୱେଷ୍ଟଇଣ୍ଡିଜ ଟିମ୍ ବିଶ୍ୱକପ୍ ଜିତିଥିବା ବେଳେ ୧୯୮୩ରେ ଫାଇନାଲରେ ପହଂଚିଥିଲା । କେବଳ ଦିନିକିଆ ନୁହେଁ ଟି-୨୦ ବିଶ୍ୱକପକୁ ମଧ୍ୟ ଦୁଇ ଥର ନିଜ ନାଁରେ କରିସାରିଛି ୱେଷ୍ଟଇଣ୍ଡିଜ ଟିମ । ଯଦି ବିଶ୍ୱକପ କଥା କହିବା ତେବେ ଅଷ୍ଟ୍ରେଲିଆ ପରେ ସବୁଠାରୁ ଅଧିକ ସଫଳ ହୋଇଥିବା ଟିମ୍ ହେଉଛି ୱେଷ୍ଟଇଣ୍ଡିଜ ।
କିନ୍ତୁ ଚଳିତ କିଛି ବର୍ଷ ଧରି ଲଗାତର ଖରାପ ପ୍ରଦର୍ଶନ କରିଆସୁଛି ଓ୍ବେଷ୍ଟଇଣ୍ଡିଜ ଦଳ । ଏମିତି କି ୨୦୨୩ ବିଶ୍ୱକପ ଖେଳିବା ପୂର୍ବରୁ ୱେଷ୍ଟଇଣ୍ଡିଜ ଦଳକୁ କ୍ୱାଲିଫାୟର ମ୍ୟାଚ ଖେଳିବାକୁ ପଡିଥିଲା । କିନ୍ତୁ କ୍ୱାଲିଫାୟରରେ ମଧ୍ୟ ଭଲ ପ୍ରଦର୍ଶନ କରିପାରି ନଥିଲା ଦଳ ।
ପ୍ରଥମେ ଜିମ୍ବାୱେ ଓ ପରେ ନେଦରଲ୍ୟାଣ୍ଡ ଠାରୁ ପରାଜିତ ହୋଇଥିଲା । ଏହାପରେ ବି ୱେଷ୍ଟଇଣ୍ଡିଜ ଟିମ୍ ସୁପର ସିକ୍ସରେ ସ୍ଥାନ ପାଇଥିଲା । ମାତ୍ର ସେଠାରେ ସ୍କଟଲ୍ୟାଣ୍ଡ ଠାରୁ ପରାଜିତ ହୋଇଥିଲା ଦଳ । ଆଇସିସିର ନିୟମ ମୁତାବକ ଏହି ପରାଜୟ ପରେ ୱେଷ୍ଟଇଣ୍ଡିଜ ଟିମ୍ ୨୦୨୩ ବିଶ୍ୱକପରୁ ବାଦ ପଡିଛି । ତେବେ ବିଶ୍ବକପ କ୍ରିକେଟରୁ ଓ୍ବେଷ୍ଟଇଣ୍ଡିଜ ବାଦ ପଡ଼ିବା ଖବର ସମଗ୍ର ବିଶ୍ବର କ୍ରିକେଟ ପ୍ରସଂଶକଙ୍କୁ ଚକିତ କରିଦେଇଛି ।
