ସରକାରଙ୍କୁ ପାଣି ପିଆଇସାରିଲେଣି ଡ୍ରାଇଭର ସଙ୍ଘ

ଭୁବନେଶ୍ୱର (ବଡ଼ ଖବର ବ୍ୟୁରୋ): ସରକାରଙ୍କୁ ପାଣି ପିଆଇସାରିଲେଣି ଡ୍ରାଇଭର ସଙ୍ଘ । ଆନ୍ଦୋଳନ ପାଇଁ ଲୋକେ କଲବଲ । ହେଲେ ଆକ୍ସନ ବଦଳରେ ନିରୁପାୟ ହୋଇ ବସିଛନ୍ତି ସରକାର । ଆଗକୁ ଇଲେକ୍ସନ । ଡ୍ରାଇଭର ସଙ୍ଘ ପାଖେ ବିଶାଳ ସଂଖ୍ୟା । ପୁଣି ଅନେକ ଚେଷ୍ଟା ପରେ ବି ସଙ୍ଘରେ ଫାଟ ନୁହେଁ ବରଂ ବଢିଛି ଏକତା । ଯାହା ସରକାରଙ୍କୁ ନାକେଦମ କରିଛି । ଆନ୍ଦୋଳନର ମାସେ ପୂର୍ବରୁ ସେମାନେ ଚେତାବନୀ ଦେଲେ । ସରକାର ଚୁପ୍ ବସିଲେ । ନା ଦାବି ପୂରଣ କଲେ ନା ଆନ୍ଦୋଳନ ରୋକିବା ଦିଗରେ ପଦକ୍ଷେପ ନେଲେ । ଏପିରିକି ସଙ୍ଘ ସହ ଆଲୋଚନା ବି କଲେ ନାହିଁ । ଏବେ ରାଜ୍ୟର ରାସ୍ତାଘାଟ ଡ୍ରାଇଭର ସଙ୍ଘ କବଜାରେ ।

ଏପିରିକି ଜରୁରୀ ସେବା ବି ବାଧାପ୍ରାପ୍ତ ହେଉଛି । କିନ୍ତୁ ସରକାର କିଛି ବି ସମାଧାନ କରିପାରୁନାହାନ୍ତି । ପୋଲିସ ନାଲି ଆଖି ଦେଖାଇଲେ, ସଙ୍ଘ ବି ନାଲିଆଖି ଦେଖାଇବାକୁ ପଛାଉନାହିଁ । ଘରୋଇ ବସ୍ ମାଲିକ ସଙ୍ଘ ଗାଡ଼ି ଚଲାଇବାକୁ ଚାହିଁଲା । ପୋଲିସ ପ୍ରୋଟେକ୍ସନ ନ ପାଇବାରୁ ସେମାନେ ବି ରହିଗଲେ । ବାହାରୁ ଆସୁଥିବା ପରିବା ଗାଡ଼ି ବି ଜାତୀୟ ରାଜପଥରେ ଅଟକି ରହିଲା । ଏପଟେ ବଜାରରେ ଆଉ ପନିପରିବା ଷ୍ଟକ୍ ନାହିଁ । ତେଣୁ ଦର ଆକାଶଛୁଆଁ । କିଛି ଜାଗାରେ କ୍ଷୀର ଗାଡ଼ିକୁ ମଧ୍ୟ ଅଟକାଯାଉଥିବା ଅଭିଯୋଗ ହୋଇଛି । ଖାଲି ଏତିକି ନୁହେଁ, ଡିପୋରୁ ତେଲଗାଡ଼ି ବି ବାହାରିପାରୁ ନାହିଁ । ଅନେକ ପେଟ୍ରୋଲ ପମ୍ପରେ ତେଲ ସରିବା ଅବସ୍ଥା । ଏ ସବୁ ଅବ୍ୟବସ୍ଥା ଦେଖି ସରକାରଙ୍କୁ ବିରୋଧୀ ଘେରିଛନ୍ତି । ବିଧାନସଭାରେ ସରକାର ବ୍ୟାକଫୁଟରେ ରହିଛନ୍ତି । ବାଚସ୍ପତି ରୁଲିଂ ଦେଲେ ସଙ୍ଘ ସହ ମନ୍ତ୍ରୀ ଆଲୋଚନା କରିବେ । ଏହାଭିତରେ ଅପରାହ୍ନରେ ଆସିଲା ପୋଲିସ ଆକ୍ସନର ଖବର । ବାଲେଶ୍ବର ଓ ସୋରରେ ପୋଲିସ ଆନ୍ଦୋଳନକାରୀଙ୍କ ତମ୍ବୁ ଭାଙ୍ଗି ଗିରଫ କରିଥିବା ଦେଖିବାକୁ ମିଳିଛି ।