ଆଜି ପ୍ରକାଶ ପାଇବ ଯୁକ୍ତ-୨ ଦ୍ୱିତୀୟ ପର୍ଯ୍ୟାୟ କଟଅଫ୍ ମାର୍କ

ଭୁବନେଶ୍ୱର (ବଡ ଖବର ବ୍ୟୁରୋ): ଆଜି ଯୁକ୍ତ-୨ ଦ୍ୱିତୀୟ ପର୍ଯ୍ୟାୟ କଟଅଫ୍ ମାର୍କ ପ୍ରକାଶ ପାଇବ । ରାଜ୍ୟରେ ୨ ହଜାରରୁ ଅଧିକ କଲେଜରେ ପ୍ରାୟ ୧ ଲକ୍ଷ ୬୦ ହଜାର ସିଟ୍ ଖାଲି ରହିଛି । ଦ୍ୱିତୀୟ ପର୍ଯ୍ୟାୟ କଟ୍ ଅଫ୍ ମାର୍କ ପ୍ରକାଶ ପାଇବା ପରେ ଆସନ୍ତା ୬ ରୁ ୮ ତାରିଖ ମଧ୍ୟରେ ନାମଲେଖା ହେବ । ଚଳିତ ଶିକ୍ଷାବର୍ଷ ପାଇଁ ପ୍ରଥମ ପର୍ଯ୍ୟାୟରେ ପ୍ରାୟ ୨ ଲକ୍ଷ ୯୫ ହଜାର ଛାତ୍ରାଛାତ୍ରୀ ନାମଲେଖାଇଛନ୍ତି । ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧିନରେ ଥିବା ୨ ହଜାର ୨୮ଟି ଜୁନିଅର କଲେଜରେ ମୋଟ ୪ ଲକ୍ଷ ୫୩ ହଜାରରୁ ଅଧିକ ସିଟ୍ ରହିଛି । ଅକ୍ଟୋବର ୮ ତାରିଖ ସୁଦ୍ଧା ନାମଲେଖାଇଥିବା ଛାତ୍ରଛାତ୍ରୀଙ୍କ ତାଲିକା ଅନଲାଇନରେ ଅପଲୋଡ୍ କରାଯିବ । ଆସନ୍ତା ୧୩ ତାରିଖରେ ସ୍ପଟ୍ ଆଡମିସନ୍ ପାଇଁ ବିଜ୍ଞପ୍ତି ପ୍ରକାଶ ପାଇବ । ଛାତ୍ରଛାତ୍ରୀମାନେ ୨ଦିନ ମଧ୍ୟରେ ବଳକା ସିଟ୍ ପାଇଁ ଆବେଦନ କରିପାରିବେ । ୧୫ରେ ସ୍ପଟ୍ ଆଡମିସନ୍ ପାଇଁ ଶେଷ ପର୍ଯ୍ୟାୟ କଟ୍ ଅଫ୍ ମାର୍କ ପ୍ରକାଶ ପାଇବ । ଅକ୍ଟୋବର ୧୭ ସୁଦ୍ଧା ନାମଲେଖା ପ୍ରକ୍ରିୟା ଶେଷ ହେବ ।