୨୦ ଆଉ ଏକ ଲଘୁଚାପ !
ଭୁବନେଶ୍ୱର (ବଡ଼ ଖବର ବ୍ୟୁରୋ): ବଙ୍ଗୋପସାଗରରେ ସକ୍ରିୟ ଲଘୁଚାପ ଅବପାତରେ ପରିଣତ ହୋଇଛି । ଯାହା ଫଳରେ ରାଜ୍ୟରେ ଅଧିକାଂଶ ଜିଲ୍ଲାରେ ବର୍ଷା ଲାଗିରହିଛି । ଏହା ପ୍ରଭାବରେ ଉତ୍ତର ଓ ପଶ୍ଚିମରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଆଜି ସକାଳ ସାଢ଼େ ୮ଟା ଯାଏଁ ପ୍ରବଳରୁ ଅତି ପ୍ରବଳ ବର୍ଷା ନେଇ ୨ ଜିଲ୍ଲା ସୁନ୍ଦରଗଡ଼ ଓ କେନ୍ଦୁଝର ଜିଲ୍ଲାକୁ ରେଡ୍ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ।
ତେବ ଆଜି ସାଢେ ୮ଟାରୁ ଆସନ୍ତାକାଲି ସାଢେ ୮ଟା ପର୍ଯ୍ୟନ୍ତ ପାଇଁ ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର ଓ ବରଗଡ଼ ପାଇଁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଥିବା ବେଳେ ୯ଟି ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ରହିଛି । ସେପଟେ ବଙ୍ଗୋପସାଗରରେ ଆଉ ଏକ ଲଘୁଚାପ ଆସୁଛି । ଏ ନେଇ ପାଣିପାଗ ବିଭାଗ ଆକଳନ କରିଛି । ୧୯ ଅଗଷ୍ଟ ସୁଦ୍ଧା ଉତ୍ତର ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ସମ୍ଭାବନା ରହିଛି । ୨୦ ତାରିଖ ସୁଦ୍ଧା ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ଆହୁରି ବଡ଼ ଅଧିକ ବର୍ଷା ଅଜାଡ଼ିବ । ଆଗାମୀ ଲଘୁଚାପ ବର୍ଷା ପ୍ରଭାବରେ ମହାନଦୀ ଫୁଲିବା ସହ ଉପକୂଳ ଓଡ଼ିଶା ପାଇଁ ବନ୍ୟା ସ୍ଥିତି ଆଣିପାରେ ।
ଭୟାବହ ପରିସ୍ଥିତି ଉତ୍ତର ଓଡ଼ିଶାରେ । ଦିନକର ବର୍ଷାରେ ମୟୂରଭଞ୍ଜରେ ମାଡ଼ି ଆସିଛି ବନ୍ୟା । ବାରିପଦା ସହର ଉବୁଟୁବୁ । ଜିଲ୍ଲାର ୨୨ ବ୍ଲକରେ ପାଣି ମାଡ଼ିଯାଇଛି । ବାଲେଶ୍ୱର ବି ଜଳାର୍ଣ୍ଣବ । ରାଉରକେଲା ସହରର ପଶିଯାଇଛି ପାଣି । କେନ୍ଦୁଝର ଆନନ୍ଦପୁରର ଅନେକ ଅଞ୍ଚଳ ଜଳବନ୍ଦୀ । ଜାତୀୟ ରାଜପଥ ଉପରେ ପାଣି ଚାଲିଛି । ବୈତରଣୀ, ବୁଢ଼ାବଳଙ୍ଗ, ଜଳକା, ସୁବର୍ଣ୍ଣରେଖା, ସାଳନ୍ଦୀ ଉଛୁଳିଛି ।
ଆନନ୍ଦପୁରରେ ବୈତରଣୀ ବିପଦ ସଙ୍କେତ ଉପରେ । ଜଳସ୍ତର ୩୯.୨୭ ମିଟର ଛୁଇଁଛି । ଆଖୁଆପଦାରେ ୧୭.୫୪ ମିଟରରେ ପ୍ରବାହିତ ହେଉଛି ପାଣି । ରାତି ସୁଦ୍ଧା ଏଠାରେ ବି ବିପଦ ସଙ୍କେତ ପାର୍ କରିଯାଇପାରେ । ଏନଏଚ-୫ ଗୋବିନ୍ଦପୁରଠାରେ ବୁଢ଼ାବଳଙ୍ଗ ୭.୬୦ ମିଟରରେ ପ୍ରବାହିତ ହେଉଛି । ରାତିରେ ବିପଦ ସଙ୍କେତ ଟପିପାରେ । ଜଳକା ବି ଫୁଲିବା ସହ ବିପଦ ସଙ୍କେତ ଉପରେ ପ୍ରବାହିତ ହେଉଛି ।