ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୫ କୋଟି ୬୭ ଲକ୍ଷ ଭୋଟର
କୋଲକାତା (ବଡ଼ ଖବର ବ୍ୟୁରୋ): ପଶ୍ଚିମବଙ୍ଗରେ ହିଂସା ମଧ୍ୟରେ ଆଜି ୭୩,୦୦୦ରୁ ଅଧିକ ଆସନରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଆରମ୍ଭ ହୋଇଛି ଭୋଟ ଗ୍ରହଣ। କଡ଼ା ସୁରକ୍ଷା ମଧ୍ୟରେ ସକାଳ ୭ଟାରୁ ହେଉଛି ମତଦାନ । ୫ କୋଟି ୬୭ ଲକ୍ଷ ଭୋଟର ନିର୍ଦ୍ଧାରଣ କରିବେ ଭାଗ୍ୟ । ଆସନ୍ତା ଜୁଲାଇ ୧୧ ତାରିଖରେ ଘୋଷଣା ହେବ ଫଳାଫଳ । ୬୩୨୨୯ ପଞ୍ଚାୟତ ଓ ୯୭୩୦ ପଞ୍ଚାୟତ ସମିତି ପାଇଁ ଚାଲିଛି ମତଦାନ । ୯୨୮ ଜିଲ୍ଲା ପରିଷଦ ପାଇଁ ଚାଲିଛି ଭୋଟିଂ । ସେପଟେ ପ୍ରାର୍ଥିପତ୍ର ଦାଖଲ ସମୟରେ ହୋଇଥିବା ହିଂସା ଭଳି ଭୋଟ ଗ୍ରହଣ ଠିକ ପୂର୍ବରୁ ବି ଏମିତି ହିଂସା ଦେଖାଦେଇଛି।
ଶୁକ୍ରବାର ରାତିରେ ତ୍ରୁଣମୂଳ କଂଗ୍ରେସ ଓ କଂଗ୍ରେସର କର୍ମୀମାନଙ୍କ ମଧ୍ୟରେ ସଂଘର୍ଷ ହୋଇଛି। ଗୋଟିଏ ଘରକୁ ଭାଙ୍ଗି ଦିଆଯାଇଛି। ସେହିପରି ଜଣେ ବିଜେପି କର୍ମୀଙ୍କ ଘର ଉପରକୁ ଟିଏମସି କର୍ମୀ ଆକ୍ରମଣ କରିଥିବା ଅଭିଯୋଗ ଆସିଛି। ଏଥିରେ ଜଣେ ଆହତ ହୋଇ ଚିକିତ୍ସିତ ହେଉଛନ୍ତି। ସ୍ଥାନେ ସ୍ଥାନେ ଏପରି ହିଂସାକୁ ଦେଖି ପୋଲିସ ପକ୍ଷରୁ କଡା ସୁରକ୍ଷା ବ୍ୟବସ୍ଥା କରାଯାଇ ଭୋଟ ଗ୍ରହଣ ଆରମ୍ଭ କରାଯାଇଛି। କଲିକତା ହାଇକୋର୍ଟଙ୍କ ନିର୍ଦ୍ଦେଶ ପରେ ପଞ୍ଚାୟତ ନିର୍ବାଚନ ସମୟରେ ରାଜ୍ୟରେ କେନ୍ଦ୍ରୀୟ ବାହିନୀ ମୁତୟନ କରାଯାଇଛି। ମତଦାନ କେନ୍ଦ୍ରରେ କେନ୍ଦ୍ରୀୟ ବାହିନୀର ପ୍ରାୟ ୮୩ ହଜାର କର୍ମଚାରୀ ନିୟୋଜିତ ହୋଇଛନ୍ତି। ଏଥିସହ ୧୯ଟି ରାଜ୍ୟର ସଶସ୍ତ୍ର ପୋଲିସ ମଧ୍ୟ ନିୟୋଜିତ ହୋଇଛନ୍ତି।