ବ୍ଲକ ପ୍ରଶାସନ ଓ ଗାଁସାଥୀ ସଂଘର ସମନ୍ୱୟ ବୈଠକ

ପୁଇଁନ୍ତଳା (ବଡ଼ ଖବର ବ୍ୟୁରୋ): ବଲାଙ୍ଗୀର ଜିଲ୍ଲା ପୁଇଁନ୍ତଳା ବ୍ଲକ ବନ୍ଧପଡ଼ା ପଞ୍ଚାୟତ ନାର୍ଷରିଠାରେ ଆଜି ପୁଇଁନ୍ତଳା ବ୍ଲକ ପ୍ରଶାସନ ଏବଂ ଗାଁସାଥୀ ମଧ୍ୟରେ ଏକ ସମନ୍ଵୟ ବୈଠକ ଅନୁଷ୍ଠିତ ହୋଇଛି। ବୈଠକରେ ମୁଖ୍ୟଅତିଥି ଭାବେ ପୁଇଁନ୍ତଳା ବିଡିଓ ରବି ନାରାୟଣ ଆଚାର୍ଯ୍ୟ ଏବଂ ସମ୍ମାନିତ ଅତିଥି ଭାବେ ଏପିଓ ପ୍ରେମାନନ୍ଦ ମିଶ୍ର ଯୋଗଦେଇଥିଲେ। ପୁଇଁନ୍ତଳା ବ୍ଲକ ଅଧୀନରେ ଥିବା ୨୫ ପଞ୍ଚାୟତର ସମସ୍ତ ଗାଁସାଥୀ କାର୍ଯ୍ୟକ୍ରମରେ ଯୋଗଦେଇ ପ୍ରଶାସନ ଏବଂ ଗାଁସାଥୀ ମିଶି ମହାତ୍ମାଗାନ୍ଧୀ କର୍ମନିଯୁକ୍ତି ଯୋଜନାରେ ସମସ୍ତ କାମ କରିବା ପାଇଁ ଆଗ୍ରହ ପ୍ରକାଶ କରିଥିଲେ।

ପ୍ରଶାସନକୁ ଗାଁ ସାଥୀ ସଂଗଠନ ତରଫରୁ ପାଞ୍ଚ ଦଫା ସମ୍ବଳିତ ଦାବିପତ୍ର ଦିଆଯିବା ସହ ବିଭିନ୍ନ ପ୍ରଶ୍ନ ପଚରା ଯାଇଥିଲା। ସମସ୍ତ ପ୍ରଶ୍ନର ଉତ୍ତର ଏପିଓ ମିଶ୍ର ପ୍ରଦାନ କରିଥିଲେ। କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଜିଲ୍ଲା ଗାଁସାଥୀ ସଂଘ ସଭାପତି ସଞ୍ଜୟ ଗଡ଼ତିଆ ଯୋଗଦେଇଥିବା ବେଳେ ବ୍ଲକ ସଭାପତି ପରମେଶ୍ୱର ଅମାତ ସଭାପତିତ୍ୱ କରିଥିଲେ।