ସାଧାରଣତନ୍ତ୍ର ଦିବସରେ ଉଡିଲା ରାଜ୍ୟର ଉଚ୍ଚତମ ଜାତୀୟ ପତାକା

ରାଉରକେଲା(ବଡ଼ ଖବର ବ୍ୟୁରୋ): ଷ୍ଟିଲସିଟି ରାଉରକେଲାରେ ଉଡିଲା ରାଜ୍ୟର ଉଚ୍ଚତମ ଜାତୀୟ ପତାକା । ରାଉରକେଲା ଇସ୍ପାତ କାରଖାନା ପକ୍ଷରୁ ସାଧାରଣତନ୍ତ୍ର ଦିବସ ଉପଲକ୍ଷେ ଏହାର ଉଦଘାଟନ କରାଯାଇଛି । ଇସ୍ପାତ ସହରର ଟେଲିଫୋନ ଭବନ ପଡିଆ ନିକଟରେ ଏକ ଆକର୍ଷଣୀୟ ଉଦ୍ୟାନ ପ୍ରସ୍ତୁତ କରାଯାଇଛି । ୭୦ ମିଟର ଉଚ୍ଚତା ବିଶିଷ୍ଟ ଫ୍ଲାଗପୋଲ ସ୍ଥାପନ କରାଯାଇ ୭୨ ଫୁଟ ଲମ୍ବା ଓ ୪୮ ଫୁଟ ଚଉଡା ବିଶିଷ୍ଟ ଜାତୀୟ ପତାକା ଉତ୍ତୋଳନ କରାଯାଇଛି । ଏହି ବିଶାଳକାୟ ଜାତୀୟ ପତାକାକୁ ସ୍ୱାଧୀନତା ସଂଗ୍ରାମୀ ଓ ମହାପୁରୁଷଙ୍କ ବିରତ୍ୱର ଗାଥା ଭାବେ ସମର୍ପିତ କରାଯାଇଛି । ଏହାକୁ ଦେଖିବା ପାଇଁ ଟେଲିଫୋନ ଭବନ ପଡ଼ିଆରେ ଲୋକଙ୍କ ଭିଡ଼ ଦେଖିବାକୁ ମିଳିଥିଲା । ରାଉରକେଲା ସହରବାସୀ ଖୁସିର ସହ ସାଧାରଣତନ୍ତ୍ର ଦିବସ ପାଳନ କରିଛନ୍ତି ।