ଆଜି ରାହୁଲଙ୍କ ଜନ୍ମଦିନ, ସେବା ଦିବସ ପାଳିବ କଂଗ୍ରେସ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଆଜି କଂଗ୍ରେସ ନେତା ରାହୁଲ ଗାନ୍ଧୀଙ୍କ ଜନ୍ମଦିନ । ୧୯୭୦ ମସିହା ଜୁନ ୧୯ରେ ଜନ୍ମଗ୍ରହଣ କରିଥିଲେ ରାହୁଲ । ଆଜି ସେ ୫୧ବର୍ଷରେ ପଦାର୍ପଣ କରିଛନ୍ତି । ତେବେ ରାହୁଲଙ୍କ ଜନ୍ମଦିନକୁ ‘ସେବା ଦିବସ’ ଭାବେ ପାଳନ କରିବ କଂଗ୍ରେସ । ରାଜଧାନୀ ଦିଲ୍ଲୀରେ ଲୋକଙ୍କୁ ଆଜି ଫେସ ମାସ୍କ, ମେଡିସିନ କିଟ ଏବଂ ରନ୍ଧା ଖାଦ୍ୟ ସମେତ ଅନ୍ୟ କେତେକ ଅତ୍ୟାବଶ୍ୟକ ସାମଗ୍ରୀ ଦଳ ବଣ୍ଟନ କରିବ । ଏକ ବିବୃତିରେ ଦଳ ତରଫରୁ କୁହାଯାଇଛି ଯେ, ମାଗଣା ରାସନ ପାଇଁ ଲମ୍ବା ଲାଇନରେ ଛିଡ଼ା ହେଉଥିବା ଲୋକଙ୍କୁ ମାଗଣା ରାସନ ଯୋଗାଇ ଦିଆଯିବ । ଦିଲ୍ଲୀ ପ୍ରଦେଶ କଂଗ୍ରେସ କମିଟିର ଅଧ୍ୟକ୍ଷ ଚୌଧୁରୀ ଅନୀଲ କୁମାରଙ୍କ ନେତୃତ୍ବରେ ଦିଲ୍ଲୀ କଂଗ୍ରେସ କର୍ମୀମାନେ ମାସ୍କ୍, ମେଡିସିନ୍ କିଟ୍, ରନ୍ଧା ଭୋଜନ, ପାଣି ଏବଂ ଅନ୍ୟାନ୍ୟ ସାମଗ୍ରୀ ବଣ୍ଟନ କରିବ। କୁମାର ମଧ୍ୟ କହିଛନ୍ତି ଯେ, ଆଗାମୀକାଲି ରାହୁଲ୍ଜୀଙ୍କ ଜନ୍ମଦିନ ଅବସରରେ ଦିଲ୍ଲୀ କଂଗ୍ରେସ କର୍ମୀମାନେ ମହତ୍ କାର୍ୟ୍ୟ କରିବେ।
କୌଣସି ଆଡ଼ମ୍ବରପୂର୍ଣ୍ଣ କାର୍ୟ୍ୟକ୍ରମ ଆୟୋଜନ ନ କରି କଂଗ୍ରେସ ପାର୍ଟିର ପ୍ରଥା ଅନୁଯାୟୀ ଜନତାଙ୍କ ସେବା କରାଯିବ। ସମ୍ପ୍ରତି କୋଭିଡ୍-୧୯ ମହାମାରୀ ଯୋଗୁଁ ଅସୁବିଧାରେ ପଡ଼ିଥିବା ଜନତାଙ୍କୁ ସାହାଯ୍ୟ ଓ ସମର୍ଥନ କରିବା ଏହି କାର୍ୟ୍ୟକ୍ରମର ଉଦ୍ଦେଶ୍ୟ। ଏହାବ୍ୟତିରେକେ, ମାରାତ୍ମକ କରୋନାଭାଇରସ୍ ସଂକ୍ରମଣ ଯୋଗୁଁ ପ୍ରିୟ ପରିଜନଙ୍କୁ ହରାଇଥିବା ପରିବାରବର୍ଗଙ୍କୁ ମଧ୍ୟ କଂଗ୍ରେସ ନେତାମାନେ ଭେଟି ସାହାଯ୍ୟ ସହାନୁଭୂତି ପ୍ରଦାନ କରିବେ।