ଝୁମ୍ପୁରା (ବଡ଼ ଖବର ବ୍ୟୁରୋ): ଖରାଦିନ ଆରମ୍ଭରୁ ଅସହାୟ ହେଲାଣି ଜଳକଷ୍ଟ । ପାଣି ପାଇଁ ଡହଳ ବିକଳ ହେଉଛନ୍ତି ଦେଢ ଶହ ଆଦିବାସୀ ପରିବାର। ଶୋଷ ମେଣ୍ଟାଉଛି ଏବେ ଦୂଷିତ ପାଣି। ଏଭଳି ଦୃଶ୍ୟ ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ଝୁମ୍ପୁରା ବ୍ଲକ୍ ବାଲିବନ୍ଧ ପଞ୍ଚାୟତ ନାଏକ ସାହିରେ । ସରକାର ସାଧାରଣ ଲୋକମାନଙ୍କୁ ପିଇବା ପାଇଁ ବିଶୁଦ୍ଧ ପାନୀୟଜଳ ଯୋଗାଇ ଦେବା ପାଇଁ ବସୁଧା ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଉପହାସ ପାଲଟିଛି ଏହି ଯୋଜନା।
ବସୁଧା ଯୋଜନାରେ ପଞ୍ଚାୟତ ଭିତରେ ରହିଛି ଏକ ଓଭରହେଡ ଟାଙ୍କି । କିନ୍ତୁ ପାଇପଲାଇନ ଖରାପ ହୋଇଥିବା ଦେଖିବାକୁ ମିଳିଛି । ଗୋଟିଏ ଜାଗାରେ ପାଣି ବାହାରୁ ଥିବାବେଳେ ଅନ୍ୟ ଟ୍ୟାପ ଖରାପ ହୋଇଥିବା ଦେଖିବାକୁ ମିଳିଛି। ଠିକ୍ ଭାବରେ ଠିକ୍ ସମୟରେ ପାଣି ନ ଛାଡୁଥିବାରୁ ଲୋକେ ଦୂଷିତ କୂଅ ଗାଡିଆର ପାଣି ସଂଗ୍ରହ କରି ପିଉଥିବାରୁ ନାନା ରୋଗର ଶିକାର ହେଉଛନ୍ତି । ସରପଞ୍ଚଙ୍କୁ ବାରମ୍ବାର ଅଭିଯୋଗ କଲେ ମଧ୍ୟ ସରପଞ୍ଚ କର୍ଣ୍ଣପାତ କରୁନଥିବା ଅଭିଯୋଗ ହୋଇଛି ।
