ଆଜି ହେବ ମହାପ୍ରଭୁଙ୍କ ଆଡ଼ପ ବିଜେ
ପୁରୀ (ବଡ଼ ଖବର ବ୍ୟୁରୋ): ଶ୍ରୀମନ୍ଦିରରୁ ବାହାରି ଶରଧାବାଲିରେ ପହଞ୍ଚିଛି ତିନି ରଥ । ଆଜି ହେବ ମହାପ୍ରଭୁଙ୍କ ଆଡ଼ପ ବିଜେ । ଗୋଟି ପହଣ୍ଡିରେ ଚତୁର୍ଦ୍ଧା ବିଗ୍ରହ ଆଡ଼ପ ମଣ୍ଡପ(ଜନ୍ମବେଦୀ)କୁ ବିଜେ କରିବେ। ମଙ୍ଗଳବାର ଦିନ ରଥଟଣାରେ ବିଳମ୍ବ ଯୋଗୁ ଦୁଇରଥ ଶ୍ରୀଗୁଣ୍ଡିଚା ମନ୍ଦିରଠାରେ ସନ୍ଧ୍ୟା ପୂର୍ବରୁ ପହଞ୍ଚି ପାରି ନଥିଲେ।
ବଡ଼ଠାକୁରଙ୍କ ରଥ ଶରଧାବାଲିରେ ପହଞ୍ଚିଥିଲେ ବି ରାତି ଯୋଗୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ବଳଗଣ୍ଡି ଛକ ମାଉସୀ ମା’ଙ୍କ ମନ୍ଦିର ପାଖରେ ଏବଂ ଦେବୀ ସୁଭଦ୍ରାଙ୍କ ରଥ ବଡ଼ଶଙ୍ଖଠାରେ ଅଟକି ରହିଥିଲେ। ବୁଧବାର ସକାଳୁ ରଥ ଉପରେ ମଙ୍ଗଳ ଆଳତି ପରେ ସକାଳ ରଥଟଣା ଆରମ୍ଭ ହୋଇଥିଲା। ସେପଟେ ଏବେ ବି ଲୋକାରଣ୍ୟ ବଡ଼ଦାଣ୍ଡ । ଚତୁର୍ଦ୍ଧାମୂର୍ତ୍ତିକୁ ରଥରେ ଦେଖି ଭାବବିହ୍ୱଳ ହେଉଛନ୍ତି ଭକ୍ତ ।
