ପାହାଡ଼ରେ ପାଠପଢ଼ା
ପାଲଲହଡ଼ା (ବଡ଼ ଖବର ବ୍ୟୁରୋ): କରୋନା ମହାମାରୀ ଲାଗି ଅନଲାଇନରେ ଚାଲିଛି ପାଠପଢ଼ା । ନେଟୱର୍କ ନଆସିବାରୁ ଛାତ୍ରଛାତ୍ରୀମାନେ ପାହାଡ଼ ଉପରେ ଯାଇ ପାଠପଢ଼ୁଥିବା ଦେଖିବାକୁ ମିଳୁଛି । ଅନୁଗୁଳ ଜିଲ୍ଲା ପାଲଲହଡ଼ା ବ୍ଳକର ଉପାନ୍ତ ଅଞ୍ଚଳ ସଇଡ଼ା, ନଗିରା, ବରଡ଼ିହ ଓ ପେଚାମୁଣ୍ଡି ପଞ୍ଚାୟତର କିଛି ଗାଁରେ ଆସୁନି ନେଟୱର୍କ । ଯେଉଁକାରଣରୁ ଛାତ୍ର ଛାତ୍ରୀମାନେ ନେଟୱର୍କ ଆସୁଥିବା ପାହାଡ଼ ଉପରକୁ ଯାଇ ପାଠପଢ଼ୁଛନ୍ତି । ଭବିଷ୍ୟତ ଗଢ଼ିବାକୁ ଯାଉଥିବା ଛାତ୍ରଛାତ୍ରୀଙ୍କୁ ସବୁବେଳେ ରହୁଛି ବନ୍ୟଜନ୍ତୁଙ୍କ ଭୟ । 
ଗାଁକୁ ନେଟୱର୍କ ଆସୁନଥିବା ନେଇ ଅଭିଯୋଗ କରିଥିଲେ ସୁଦ୍ଧା ଫଳାଫଳ ଶୁନ । ବରିଷ୍ଟ ଆଇନଜୀବୀ ଚିତ୍ତରଞ୍ଜନ ପ୍ରଧାନ ମଧ୍ୟ ଛାତ୍ର ଛାତ୍ରୀଙ୍କ ଲାଗି ପ୍ରଶାସନକୁ ଜଣାଇଛନ୍ତି । ନେଟୱର୍କ ଆସୁନଥିବାରୁ ଏଠାରେ ଜରୁରୀ ସମୟରେ ଆମ୍ବୁଲାନ୍ସ ସେବା ଓ ଅଗ୍ନିଶମ ସେବା ପହଞ୍ଚିପାରୁନାହିଁ । ଏହି ଅଞ୍ଚଳରେ ଟାୱାର ଲଗାଇଲେ ସବୁ ସମସ୍ୟାର ସମାଧାନ ହୋଇପାରନ୍ତା ବୋଲି କହିଛନ୍ତି ସ୍ଥାନୀୟ ଲୋକେ ।