ଗଛ କଟାକୁ କେନ୍ଦ୍ର କରି ଆକ୍ରମଣ
ବିଞ୍ଝାରପୁର (ବଡ଼ ଖବର ବ୍ୟୁରୋ): ଗଛ କଟାକୁ କେନ୍ଦ୍ର କରି ପରିବାର ଲୋକଙ୍କୁ ସଙ୍ଗବଦ୍ଧଭାବେ ଆକ୍ରମଣ । ଏଭଳି ଘଟଣା ଘଟିଛି ଯାଜପୁର ବିଂଝାରପୁର ବ୍ଲକ ଅନ୍ତର୍ଗତ ଘଣ୍ଟିଆଳି ପଞ୍ଚାୟତର ଲେଙ୍କାସାହି ଗ୍ରାମରେ । ଅଭିଯୋଗ ଅନୁଯାୟୀ ସେହି ଗ୍ରାମର ଅଭିରାମ ବେହେରା, କେଦାର ବେହେରା ଓ ସରୋଜ ବେହେରା ଗତ ଚାରି ତାରିଖ ଅପରାହ୍ନରେ ଉପେନ୍ଦ୍ର ରାଉତ ଓ ତାଙ୍କ ପରିବାରର କେହି ପୁରୁଷ ସଦସ୍ୟ ଘରେ ନଥିବାବେଳେ ତାଙ୍କ ଘର ସମ୍ମୁଖରେ ମଦ୍ୟପାନ କରି ତାଙ୍କ ପରିବାରର ସ୍ତ୍ରୀ ଲୋକମାନଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ ।
ଘରେ ଲାଗିଥିବା ଇଲେଟ୍ରି ମିଟର, ଗଛ, ଚଉଁରା ଓ ଅନ୍ୟାନ ଆସବାପତ୍ର କୁ ଭାଙ୍ଗିବା ସହ ଘରର ଫାଟକ ଭାଙ୍ଗି ଘର ଭିତରେ ପଶି ଉପସ୍ଥିତ ଥିବା ଘରର ମହିଳାମାନଙ୍କୁ ଅସଦାଚରଣ କରିଥିଲେ । ତାଙ୍କ ସୁନା ଗହଣା ଛଡ଼ାଇ ନେଇଯିବା ସହ ହତ୍ୟା ଧମକ ମଧ୍ୟ୍ୟ ଦେଇଛନ୍ତି । ଉପେନ୍ଦ୍ର ରାଉତଙ୍କ ପରିବାର ସଦସ୍ୟଙ୍କ ଦାବି ଦୋଷୀ ମାନଙ୍କୁ ତୁରନ୍ତ ଗିରଫ କରି ଆଇନ ଅନୁଯାୟୀ ଦଣ୍ଡ ଦିଆଯାଉ । ବିଂଝାରପୁର ପୋଲିସ ଘଟଣାସ୍ଥଳରେ ପହଁଚି ସ୍ଥିତି ପରଖିବା ସହ ତଦନ୍ତ ଆରମ୍ଭ କରିଛି ।