ପେଟ୍ରୋଲ ଢାଳି ଜଳିଗଲେ ଆଇନଜୀବୀ

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜଧାନୀର ପାଣ୍ଡରା ଅଞ୍ଚଳରେ ଗୁରୁବାର ରାତି ଅଧରେ ଘଟିଯାଇଛି ଏକ ଛାତିଧରା ଘଟଣା। ଜଣେ ଆଇନଜୀବୀ ନିଜ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଛନ୍ତି। ଖବର ପାଇ ଘଟଣାସ୍ଥଳରେ ମଞ୍ଚେଶ୍ୱର ପୋଲିସ ପହଞ୍ଚି ଅର୍ଦ୍ଧଦଗ୍ଧ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ନିଜ ଘର ଛାତରେ ଆଇନଜୀବୀ ଜଣକ ଜଳି ଯାଇଥିବା ପୋଲିସ ପକ୍ଷରୁ ସୂଚନା ମିଳିଛି। ତେବେ ଆଇନଜୀବୀ ଜଣକ କାହିଁକି ଆତ୍ମାହୁତି ଦେଲେ ସେ ସମ୍ପର୍କରେ କାରଣ କିଛି ଜଣାପଡ଼ିନାହିଁ। ପୋଲିସ ଘଟଣାର ତଦନ୍ତ କରୁଛି। ତଦନ୍ତ ପରେ ଘଟଣାର  ସ୍ପଷ୍ଟତା ଜଣାପଡ଼ିବ ବୋଲି ପୁଲିସ  କହିଛି । ପୁଲିସ ଶବ ଜବତ କରି  କ୍ୟାପିଟାଲ ହସ୍ପିଟାଲ ପଠାଇଛି ।

ପାଣ୍ଡରା ଛକ ଜଗନ୍ନାଥ ମନ୍ଦିର ନିକଟରେ ରହିଛି ମୃତ ଦୀପକଙ୍କ  ୪ ମହଲା ଘର । ସେ ଆଇନଜୀବୀ  ଭାବରେ କାମ କରୁଥିଲେ । ସେ  ବିବାହିତ ଓ ତାଙ୍କର ଦୁଇଟି ଝିଅ  ଅଛନ୍ତି । ଦୀପକ ରହୁଥିବା ଘରର  ଛାତ ଉପରେ ତାଙ୍କର ଏକ ଚାମ୍ବର  ରହିଛି । ଯେଉଁଠି ପ୍ରତିଦିନ ଲୋକେ  ଆସି ତାଙ୍କୁ ବିଭିନ୍ନ ମାମଲା ଲଢିବା ପାଇଁ ସହଯୋଗ ଲୋଡ଼ନ୍ତି । ଗତ  କିଛିଦିନ ହେବ ଦୀପକ କୌଣସି  କଥାକୁ ନେଇ ମାନସିକ ଚିନ୍ତାରେ  ରହୁଥିଲେ । ପରିବାର ଲୋକେ ତାଙ୍କୁ  ମାନସିକ ରୋଗ ବିଭାଗ ଡାକ୍ତରଙ୍କୁ  ଦେଖାଇଥିଲେ । ମାନସିକ ଦୁଃଶ୍ଚିନ୍ତାରୁ  ଦୂରେଇବା ପାଇଁ ଡାକ୍ତର   ତାଙ୍କୁ ଔଷଧ ଖାଇବାକୁ ପରାମର୍ଶ ଦେଇଥିଲେ । ହେଲେ ଦୀପକ  ଔଷଧ ଖାଉନଥିଲେ ।