ବିନା ଅନୁମତିରେ ଗଛ କାଟିବା ପଡ଼ିଲା ଭାରି, ନିଲମ୍ବିତ ଫରେଷ୍ଟର

ନବରଙ୍ଗପୁର(ବଡ଼ ଖବର ବ୍ୟୁରୋ): ଗଛ କାଟି ସସପେଣ୍ଡ୍ ହେଲେ ଫରେଷ୍ଟର । ଆର୍ଥିକ ଅନୟମିତତା ନେଇ ବନ ବିଭାଗ ପକ୍ଷରୁ ଆକ୍ସନ । ଝରିଗାଁ ରେଞ୍ଜ ମୋହରା ସେକ୍ସନର ତତ୍କାଳୀନ ଫରେଷ୍ଟର ତଥା ବର୍ତ୍ତମାନ ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକର ଜଣେ ଫରେଷ୍ଟର ନିଲମ୍ବିତ ହୋଇଛନ୍ତି । ଦେଓବନ୍ଧରୁ ଜାମାପଦର ରାସ୍ତା ପାର୍ଶ୍ୱରେ ଥିବା ୨୦ଟି ନୀଳଗିରି ଗଛ ବିନା ଅନୁମତିରେ କାଟି ଏହାକୁ ବେପାରୀଙ୍କୁ ଦେବା ଏବଂ ଆର୍ଥିକ ଅନିୟମିତତାକୁ ନେଇ ଫରେଷ୍ଟରଙ୍କ ବିରୋଧରେ ଅଭିଯୋଗ ହୋଇଥିଲା ।

ଅଭିଯୋଗ ପରେ ଡାବୁଗାଁ ରେଞ୍ଜ ମୈଦଲପୁର ସେକ୍ସନରେ କାର୍ୟ୍ୟରତ ଥିବା ବିପିନ କୁମାର ହରିଜନଙ୍କୁ ନିଲମ୍ବନ କରିଛନ୍ତି ଡିଏଫଓ ଉଦୟନ ସୁବୁଦ୍ଧି । ତଦନ୍ତ ପରେ ତାଙ୍କୁ କାରଣଦର୍ଶାଅ ନୋଟିସ୍ ଜାରି ହୋଇଥିଲା । ଉତ୍ତର ସନ୍ତୋଷଜନକ ନ ହେବାରୁ ଶେଷରେ ତାଙ୍କୁ ନିଲମ୍ବନ କରାଯାଇଛି । ନିଲମ୍ବନ ପରେ ତାଙ୍କୁ ଡିଏଫଓ କାର୍ୟ୍ୟାଳୟରେ ଅବସ୍ଥାପିତ କରାଯାଇଥିବା ବେଳେ ବିନା ଅନୁମତିରେ ଜିଲ୍ଲା ସଦର ମହକୁମା ଛାଡ଼ି ନ ପାରିବାକୁ ନିର୍ଦ୍ଦେଶ ରହିଛି ।