ବିହାର (ବଡ଼ ଖବର ବ୍ୟୁରୋ): ବିହାର ନାଳନ୍ଦା ଜିଲ୍ଲାରେ ବୋରୱେଲରେ ଫସିଛି ୪ ବର୍ଷର ଶିଶୁ । ଶିଶୁକୁ ଉଦ୍ଧାର କରିବାପାଇଁ ଯଥା ସମ୍ଭବ ଚେଷ୍ଟା କରାଯାଉଛି । ଏନଡିଆରଏଫ ଏବଂ ଅଗ୍ନିଶମ ବାହୀନିି ଉଦ୍ଧାରକାରୀ ଦଳ ଘଟଣା ସ୍ଥଳରେ ପହଂଚିଛନ୍ତି । ବରିଷ୍ଠ ଅଧିକାରୀଙ୍କ ସୂଚନା ମୁତାବକ ପିଲାଟି ଜୀବିତ ଅଛି । ପିଲାଟିର ସ୍ୱର ଶୁଣିବାକୁ ମିଳୁଛି । ଡୋମନ୍ ମାଞ୍ଝୀଙ୍କ ପୁଅ ଶୁଭମ କୁମାର ରବିବାର ସକାଳ ୯ଟା ବେଳେ ଖେଳୁଥିବାବେଳେ, ଅଚାନକ ବୋରୱେଲ ଭିତରେ ପଡିଯାଇଥିଲେ ।
ଏହାପରେ କୁନି ପୁଅଟି ସହ ଖେଳୁଥିବା ତା ସାଙ୍ଗମାନେ ଆସି ଘରେ ସୂଚନା ଦେଇଥିଲେ । ପରେ ପରେ ଉକ୍ତ ସ୍ଥାନରେ ଲୋକଙ୍କ ଗହଳି ଲାଗିଥିଲା, ଆଉ ଏବେ ଉଦ୍ଧାର କରିବାକୁ ଏନଡିଆରଏଫ୍ ଟିମ୍ ଆସି ପହଞ୍ଚିଛି । ଜିଲ୍ଲା ପ୍ରଶାସନ ତରଫରୁ ବୋରୱେଲ ଭିତରକୁ ସିସିଟିଭି କ୍ୟାମେରା ପହଞ୍ଚାଇ ଶିଶୁଟି ଉପରେ ନଜର ରଖାଯାଇଛି ।
