ଶୁଖିଲା ପଡିଛି ‘ଅମୃତ ଧାରା’

ବୀରମହାରାଜପୁର(ବଡ଼ ଖବର) : ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁରରେ ରହିଛି ବହୁ ସରକାରୀ ଓ ବେସରକାରୀ କାର୍ଯ୍ୟାଳୟ । ଏହା ବ୍ୟବସାୟିକ ପେଣ୍ଠସ୍ଥଳ ମଧ୍ୟ । ଦୈନିକ ବିଭିନ୍ନ କାମରେ ଆସୁଥିବା ଲୋକେ ପିଇବା ପାଣି ମୁନ୍ଦାଏ ପାଇଁ ଡହଳ ବିକଳ ହୋଇଥାନ୍ତି । ବାରମ୍ବାର ଦାବି ପରେ ମୁଖ୍ୟ ଛକରେ ତିଆରି ହୋଇଛି ଅମୃତ ଧାରା ପ୍ରକଳ୍ପ । ୨୦୧୨-୧୩ ଆର୍ଥିକ ବର୍ଷରେ ଅଢେ଼ଇଲକ୍ଷ ଟଙ୍କାର ବ୍ୟୟରେ ପ୍ରକଳ୍ପଟି ନିର୍ମାଣ କରାଯାଇଛି । ଏଥିପାଇଁ ବୋରୱେଲ ଖନନ ସହ ପମ୍ପଘର ନିର୍ମାଣ ଓ ଶୀତଳିକରଣ ଯନ୍ତ୍ର ମଧ୍ୟ ସ୍ଥାପିତ ହୋଇଛି । ମାତ୍ର ରକ୍ଷଣାବେକ୍ଷଣ ଅଭାବରୁ ପ୍ରକଳ୍ପ ଅଧିକାଂଶ ସମୟରେ ଅଚଳ ହୋଇପଡୁଛି । କେତେବେଳେ ଯାନ୍ତ୍ରିକ ତ୍ରୁଟି ତ କେତେବେଳେ ବିଦ୍ୟୁତ ବିଭ୍ରାଟରୁ ଏହି ପ୍ରକଳ୍ପ ଚାଲି ପାରୁନାହିଁ । ବାରମ୍ବାର ଦାବି ପରେ ମଧ୍ୟ ପ୍ରତିକାର ହୋଇପାରୁନଥିବାରୁ ସାଧାରଣରେ ତୀବ୍ର ଅସନ୍ତୋଷ ଲାଗିରହିଛି । ଶୁଖିଲା ପଡିଥିବା ଏହି ଅମୃତ ଧାରା ପ୍ରକଳ୍ପ କେବେ ଚାଲିବ ଦେଖିବାକୁ ବାକି ରହିଲା ।