ବାଲିଆପାଳ, (ବଡ଼ ଖବର ବ୍ୟୁରୋ): ସରକାର ଜନସାଧାରଣଙ୍କ ମୌଳିକ ସୁବିଧା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ରାସ୍ତା ଭଳି ଅନେକ ପ୍ରକଳ୍ପ ତିଆରି ହେଉଛି । କିନ୍ତୁ ଏମିତି ଗାଁ ଅଛି ଯେଉଁଠି ରାସ୍ତାର ଅବସ୍ଥା ଅତି ଶୋଚନୀୟ । ଲୋକେ କୁହନ୍ତି ଯମ ମଧ୍ୟ ଗ୍ରାମକୁ ପ୍ରବେଶ କରିବାକୁ ଡ଼ରୁଛି । ଦୀର୍ଘଦିନ ଧରି ମରାମତି ହେଉନଥିବାରୁ ରାସ୍ତା ଏବେ ମରଣଯନ୍ତା ପାଲଟିଛି ।
ବାଲିଆପାଳ ବ୍ଲକ୍ ଦେଉଳା ପଞ୍ଚାୟତର ବାସୁଦେବପୁର । ଏହି ଗାଁ ରାସ୍ତା ଦୀର୍ଘଦିନ ହେବ ମରାମତି ହୋଇନାହିଁ । ମରାମତି ଓ ରକ୍ଷଣାବେକ୍ଷଣ ଅଭାବରୁ ରାସ୍ତା ଅବସ୍ଥା ଅତି ଖରାପ ହୋଇପଡିଛି। ଅସରାଏ ବର୍ଷାରେ ରାସ୍ତା କାଦୁଅ ପଚପଚ । ଗମନାଗମନରେ ବହୁ ଅସୁବିଧାର ସମ୍ମୁଖିନ ହେଉଛନ୍ତି ଗାଁ ଲୋକେ । ଗ୍ରାମର ଏହା ମୁଖ୍ୟରାସ୍ତା । ରାସ୍ତା ମରାମତି ପାଇଁ ଗ୍ରାମବାସୀ ବହୁବାର ସରପଞ୍ଚ ଓ ବ୍ଲକ ପ୍ରଶାସନକୁ ଲିଖିତ ଅଭିଯୋଗ କରିଛନ୍ତି । ମାତ୍ର ପ୍ରଶାସନ ଶୁଣୁନଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି। ଆଗାମୀ ଦିନରେ ରାସ୍ତା ମରାମତି କରାନଗଲେ ଗ୍ରାମବାସୀ ଆନ୍ଦୋଳନକୁ ଉହ୍ଲାଇବାକୁ ଧମକ ଦେଇଛନ୍ତି। ଏହି ଗାଁ ରାସ୍ତା କେବେ ମରାମତି ହେଉଛି ‘ବଡ଼ ଖବର’ ନଜର ରଖିଛି ।
