https://youtu.be/D8HYKiPTjZ8
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବ୍ୟାପକ ବିରୋଧ ଭିତରେ ଆଜି ବାଂଲାଦେଶରେ ଆରମ୍ଭ ହୋଇଛି ଭୋଟ୍ । ନିର୍ବାଚନକୁ ଆଗୁଆ ବୟକଟ୍ କରିଛି ପ୍ରମୁଖ ବିରୋଧୀ ବିଏନ୍ପି । ଗତକାଲି ୧୪ଟି ମତଦାନ କେନ୍ଦ୍ର ସହ ୨ଟି ସ୍କୁଲ ଜାଳିଥିଲେ ଆନ୍ଦୋଳନକାରୀ । ନିଆଁଲଗା ଘଟଣାରେ ଏପର୍ଯ୍ୟନ୍ତ ୫ ଜଣଙ୍କୁ ଗିରଫ କରିଛି ପୋଲିସ । ବାଂଲାଦେଶ ସଂସଦର ୩୦୦ଟି ଆସନ ପାଇଁ ଭୋଟଗ୍ରହଣ ସକାଳ ୮ଟାରୁ ଆରମ୍ଭ ହୋଇ ଆପରାହ୍ନ ୪ଟାରେ ଶେଷ ହେବ ।
ଏହି ନିର୍ବାଚନରେ ୧୭ କୋଟିରୁ ଉର୍ଦ୍ଧ୍ୱ ଭୋଟର ପଞ୍ଜିକୃତ ହୋଇଛନ୍ତି । ଭୋଟ ଗ୍ରହଣ ଶେଷ ହେବା ପରେ ତୁରନ୍ତ ଭୋଟ ଗଣତି କରାଯିବ ଏବଂ ସୋମବାର ଶେଷ ସୁଦ୍ଧା ଫଳାଫଳ ପ୍ରକାଶ ପାଇବାର ସମ୍ଭାବନା ରହିଛି । ଏହି କ୍ରମରେ ପ୍ରଧାନମନ୍ତ୍ରୀ ଶେଖ ହସୀନାଙ୍କ ଆୱାମୀ ଲିଗ୍ ଦଳ ୪ର୍ଥ ଥର ପାଇଁ କ୍ଷମତା ହାସଲ କରିବାକୁ ଲକ୍ଷ ରଖିଛି । ତେବେ ନିର୍ବାଚନ ସମୟରେ କୌଣସି ପ୍ରକାର ହିଂସାକୁ ଏଡ଼ାଇବା ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।
ଏଥିପାଇଁ ୮ ଲକ୍ଷରୁ ଉର୍ଦ୍ଧ୍ୱ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଥିବା ବେଳେ ସମ୍ବେଦନଶୀଳ ସ୍ଥାନରେ ସେନା ଜବାନ ମୁତୟନ ହୋଇଛନ୍ତି । ଏହି ସାଧାରଣ ନିର୍ବାଚନରେ ୨୭ଟି ରାଜନୈତିକ ଦଳର ୧୫୦୦ରୁ ଉର୍ଦ୍ଧ୍ୱ ପ୍ରାର୍ଥୀ ମଇଦାନକୁ ଓହ୍ଲାଇଥିବା ବେଳେ ସେମାନଙ୍କ ବ୍ୟତୀତ ୪୩୬ ଜଣ ସ୍ୱାଧୀନ ପ୍ରାର୍ଥୀ ମଧ୍ୟ ଅଛନ୍ତି । ଭାରତର ୩ ଜଣ ପର୍ଯ୍ୟବେକ୍ଷକଙ୍କ ସମେତ ୧୦୦ରୁ ଅଧିକ ବିଦେଶୀ ପର୍ଯ୍ୟବେକ୍ଷକ ନିର୍ବାଚନର ସୁରକ୍ଷା ଉପରେ କଡ଼ା ନଜର ରଖିବେ ।
