ଗାଁରେ ପହଞ୍ଚିଲା ମାଲେସିଆରେ ମୃତ ଯୁବକଙ୍କ ମରଶରୀର

ବରୀ (ବଡ଼ ଖବର ବ୍ୟୁରୋ): ମୃତ୍ୟୁର ୯ ଦିନ ପରେ ମାଲେସିଆରୁ ଆସି ଗାଁ ମାଟିରେ ପହଞ୍ଚିଲା ଓଡ଼ିଆ ଯୁବକଙ୍କ ମୃତ ଶରୀର। ଯାଜପୁର ଜିଲ୍ଲା ବରୀ ବ୍ଲକ ସ୍ୱାଇଁଖଣ୍ଡ ପଞ୍ଚାୟତ କଳାଖଣ୍ଡ ଗ୍ରାମର ଜଗବନ୍ଧୁ ସାହୁଙ୍କ ପୁଅ ଜ୍ୟୋତିରଂଜନ ସାହୁ  ଦୀର୍ଘ ୬ ବର୍ଷ ଧରି ମାଲେସିଆର ଏକ ଘରୋଇ ହୋଟେଲ କାମ କରୁଥିଲେ। ଗତ ୧୬ ତାରିଖ ଦିନ ଜ୍ୟୋତିରଂଜନ ନିଜ ରୁମରେ ଆତ୍ମହତ୍ୟା କରିଥିବା ଖବର ପରିବାରଙ୍କ ନିକଟରେ ପହଞ୍ଚିଥିଲା।

ଯାହାକୁ ପରିବାର ଲୋକେ ବିଶ୍ୱାସ କରିନଥିଲେ ତାଙ୍କ ପୁଅ ଆତ୍ମହତ୍ୟା କରିପାରିବନି କହି ପୁଅକୁ ହତ୍ୟା କରି ଆତ୍ମହତ୍ୟାର ରୂପ ଦେଇଥିବା ବରୀ ଥାନାରେ ଲିଖିତ ଅଭିଯୋଗ କରିଥିଲେ । ତାସହିତ ପୁଅର ମର ଶରୀର ଗାଁ ମାଟିକୁ ଫେରାଇ ଆଣିବାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିକଟକୁ ଜ୍ୟୋତିରଂଜନଙ୍କ ମାଆ ଚିଠି ଲେଖିବା ସହ ଜିଲ୍ଲା ପ୍ରଶାସନକୁ ନିବେଦନ କରିଥିଲେ ପରିବାର ଲୋକେ।

ସରକାରଙ୍କ ନୀତି ନିୟମ ଅନୁଯାୟୀ ସମସ୍ତ ବନ୍ଦୋବସ୍ତ କରାଯିବା ସହ ଶେଷରେ ୯ ଦିନ ପରେ ଆଜି ଜ୍ୟୋତିରଂଜନଙ୍କ ମରଶରୀର ଗାଁ ମାଟିରେ ପହଞ୍ଚିଛି। ଗାଁରେ ଜ୍ୟୋତିରଂଜନଙ୍କ ମରଶରୀର ପହଞ୍ଚିବା ପରେ ଏକ ଶୋକାକୂଳ ପରିବେଶ ସୃଷ୍ଟି ହୋଇଛି। ବିଜେଡି ନେତା ବିଶ୍ବରଂଜନ ମଲ୍ଲିକ ପରିବାର ନିକଟରେ ପହଞ୍ଚି ପରିବାର ଲୋକଙ୍କୁ ସାନ୍ତ୍ୱନା ଦେବା ସହ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ଏକ ଶୋକାକୂଳ ପରିବେଶରେ ଗାଁ ମଶାଣିରେ ଜ୍ୟୋତିରଂଜନଙ୍କ ଶେଷକୃତ୍ୟ ସମ୍ପନ୍ନ ହୋଇଛି।