ମୁହଁ ଖୋଲିଲେ ଚିତ୍ରକୋଣ୍ଡା ବିଡିଓ

ମାଲକାନଗିରି (ବଡ଼ ଖବର ବ୍ୟୁରୋ): ଚିତ୍ରକୋଣ୍ଡା ବିଡିଓ ଲରିମନ ଖର୍ସେଲଙ୍କ ଏକ ଆଲବମ ଭିଡିଓକୁ ନେଇ ଦୁଇଦିନ ହେବ ଚର୍ଚ୍ଚା ଜୋର ଧରିଥିଲା । ଲରିମନ କ୍ଷମତାର ଅପବ୍ୟବହାର କରୁଥିବା ଅଭିଯୋଗ ହେଉଥିଲା । ଦୁଇଦିନ ପରେ ଏହି ଘଟଣାକୁ ନେଇ ମୁହଁ ଖୋଲିଛନ୍ତି ବିଡିଓ । ‘ମୋ ବିରୋଧରେ ମିଥ୍ୟା ଗୁଜବ ପ୍ରଚାର କରାଯାଉଛି । ମୁଁ କ୍ଷମତାର ଅପବ୍ୟବହାର କରୁନାହିଁ । ସାରା ଓଡ଼ିଶାର ଲୋକଙ୍କ ନିକଟରେ ଚିତ୍ରକୋଣ୍ଡାର ସୌନ୍ଦର୍ଯ୍ୟକୁ ପହଞ୍ଚାଇବା ଏବଂ ଇକୋ ପାର୍କକୁ ପର୍ଯ୍ୟଟନସ୍ଥଳୀର ମାନ୍ୟତା ଲାଗି ମୁଁ ଏହି ଆଲବମଟି ଅବସର ସମୟରେ ବନେଇଛି । ଇକୋ ପାର୍କର ସୌନ୍ଦର୍ଯ୍ୟ ଦେଖିବା ପରେ ଜାତୀୟ ନିର୍ଦ୍ଦେଶକମାନଙ୍କ ସୁଅ ଛୁଟିବ’ ବୋଲି ସେ କହିଛନ୍ତି ।
ଚିତ୍ରକୋଣ୍ଡା ବ୍ଲକର ଧୂଳିପୁଟ ଭଳି ମାଓ ଇଲାକାରେ ପ୍ରଥମେ ଜଣେ ପ୍ରଶାସନିକ ଅଧିକାରୀ ଭାବେ ପହଞ୍ôଚ ଚର୍ଚ୍ଚାରେ ରହିଥିଲେ ଲରିମନ । ଏମଜିଏନଆରଜିଏସ କାମ ବିଛିନ୍ନାଞ୍ଚଳରେ ପ୍ରଥମଥର ଲାଗି କରାଇଥିଲେ ଲରିମନ । ଅଳ୍ପଦିନରେ ସେ ସ୍ଥାନୀୟ ଲୋକଙ୍କ ହୃଦୟ ଜିତିପାରିଥିଲେ । ମନ୍ଦ ଉଦ୍ଦେଶ୍ୟ ରଖି କିଛିଲୋକ ବିଡିଓଙ୍କ ବିରୋଧରେ ମିଥ୍ୟା ଗୁଜବ ପ୍ରଚାର କରୁଛନ୍ତି ବୋଲି କହିଛନ୍ତି ସ୍ଥାନୀୟ ଲୋକେ ।